موٹر سائیکل چوری کی 60 سے زائد وارداتوں میں ملوث 3 ملزمان گرفتار

گلستان جوہر سے فنکشنل لیگ کے دفتر پر فائرنگ کرنے والا ملزم گرفتار، نیو کراچی سے بھتہ خور بلال دھرلیا گیا۔ فوٹو: فائل

---

سی آئی ڈی اور پولیس نے مختلف علاقوں میں کارروائی کرتے ہوئے ٹارگٹ کلرز سمیت11 ملزمان کو گرفتار کر کے اسلحہ اور منشیات برآمد کرلی۔

تفصیلات کے مطابق سی آئی ڈی گارڈن کی پولیس نے گلبہار کے علاقے لیاقت چوک پر کارروائی کرتے ہو ئے ایک ملزم ظہیر عرف پیالہ کو گرفتار کر کے اس کے قبضے سے ایک پستول برآمد کر لی جبکہ اس کی نشاندہی پر ایک مکان پر چھاپہ مار کر ایک کلاشنکوف اور 4 دستی بم بھی برآمد کرلیے، ایس پی سی آئی ڈی عثمان باجوہ نے اپنے دفتر میں پریس کانفرنس کے دوران بتایا کہ گرفتار ملزم کا تعلق کالعدم سپاہ صحابہ سے ہے، ملزم ٹارگٹ کلنگ کی متعدد وارداتوں میں ملوث ہے، گرفتار ملزم نے دوران تفتیش آصف پولیس والے، ڈاکٹر غضنفر علی، حیدر عباس اور حسن گلگتی کے قتل کا اعتراف کیا ہے۔

ملزم سے عباس کمیلی کے بیٹے کی ہلاکت کے حوالے سے بھی تفتیش کی جارہی ہے ، سی آئی ڈی نے دوسری کارروائی میں گلستان جو ہر بھٹائی آباد سے رضوان کو گرفتار کیا ، ملزم نے 2013 میں سہراب گوٹھ کے علاقے میں پاکستان مسلم لیگ فنکشنل کے دفتر پر فائرنگ کر کے ایک شخص کو قتل کیا تھا جبکہ تیسری کارروائی میں3ملزمان کو گرفتار کرکے 2 موٹر سائیکل برآمد کی، ایس پی نے بتایا کہ ملزمان موٹر سائیکل لفٹنگ کی 60 سے زائد وارداتوں میں ملوث ہیں۔

بغدادی پولیس نے جوڑیا بازار کھجور چوک کے قریب سے پولیس مقابلے کے بعد لیاری گینگ وار کے ایک ملزم زاکر بلوچ ولد قادر بلوچ کو زخمی حالت میں گرفتار کر کے پستول برآمد کر لیا پولیس کو پولیس کی حراست میں طبی امداد کے لیے سول اسپتال منتقل کر دیا گیا، پیر آباد پولیس نے اورنگی ٹاؤن نمبر 4 پوسٹ آفس کے قریب سے ایک ملزم اکبر حسین کو گرفتار کر کے اس کے قبضے سے ایک پستول اور ایک کلو200 گرام چرس برآمد کر لی، ایس ڈی پی او خواجہ اجمیر نگری ڈی ایس پی الطاف حسین نے پولیس پارٹی کے ہمراہ نیو کراچی سیکٹر5/E میں کارروائی کے بعد ملزم بلال کو گرفتار کرلیاْ

پولیس کے مطابق گرفتار ملزم بھتہ خوری کی وارداتوں میں پولیس کو مطلوب تھا ، شیر شاہ پولیس نے اسنیپ چیکنگ کے دوران اسٹریٹ کرائم کی واردات میں ملوث ملزم شعیب کو گرفتار کر کے ٹی ٹی پستول برآمد کرلی، ایس ایچ او اقبال مارکیٹ انسپکٹر غلام رسول راجپر نے پولیس پارٹی کے اورنگی ٹاؤن سیکٹر ساڑھے گیارہ میں کارروائی کرتے ہوئے 2 ملزمان شاہنواز اور محمد مصطفیٰ کو گرفتار کرلیا۔