پشاور میں مختلف نوعیت کے 4 دھماکوں میں بچوں سمیت 11 افراد زخمی

ہشت نگری کے علاقے رام پورہ گیٹ میں گھر کے اندر سلنڈر پھٹنے سے ہونے والے دھماکے میں خاتون اور بچہ زخمی ہوگئے۔ فوٹو: ایکسپریس نیوز

---

شہر میں مختلف نوعیت کے 4 دھماکوں میں بچوں سمیت 11 افراد زخمی ہوگئے۔

ایکسپریس نیوز کے مطابق پہلا دھماکا پھندو روڈ پر ہوا جہاں ایک گھر پر دستی بم حملہ کیا گیا جس سے 4 بچے زخمی ہو گئے، دوسرا دھماکا ہشت نگری کے علاقے رام پورہ گیٹ میں گھر کے اندر سلنڈر پھٹنے سے ہوا جس سے خاتون اور بچہ زخمی ہوگئے جبکہ دھماکے میں گھر کو بھی نقصان پہنچا۔

پشاور میں ہی تیسرا دھماکا دلہ زاک روڈ گل آباد چوک میں ایک گھر کےعقب میں ہوا جس کی آواز دور دور تک سنی گئی، دھماکا خیز مواد کچرے کے ڈھیر میں رکھا گیا تھا جس سے گھر کو بھی نقصان پہنچا، چوتھا دھماکا بڈھ بیر کے علاقے میں ہوا جہاں ایک گھر پر دستی بم سے حملہ کیا گیا جس سے 5 افراد زخمی ہوگئے جنہیں طبی امداد کے لئے اسپتال منتقل کردیا گیا۔