ٹریفک حادثے میں نوجوان ہلاک مشتعل افراد نے ٹرک نذرآتش کردیا

نیوکراچی اللہ والی چورنگی کے قریب مشتعل افرادکے ہاتھوں جلائے جانیوالے ٹرک کوہٹایاجارہاہے فوٹو : ایکسپریس

---

سہراب گوٹھ میں تیز رفتار ٹرک نے موٹر سائیکل پر سوار بھائی بہن کو ٹکر مار دی جس سے بھائی ہلاک جبکہ بہن زخمی ہوگئی ۔

واقعے کے بعد مشتعل افراد نے ٹرک کو آگ لگادی جبکہ حادثے کا ذمے دار ڈرائیور فرار ہوگیا ، اورنگی ٹائون میں ٹرک کی چھت سے گر کر کلینر ہلاک ہوگیا ، تفصیلات کے مطابق سہراب گوٹھ کے صنعتی ایریا میں تیز رفتار ٹرک کی ٹکر سے موٹر سائیکل سوار نوجوان ہلاک ہوگیا۔

جبکہ اس کی بہن زخمی ہوگئی ، سہراب گوٹھ صنعتی ایریا چوکی کے انچارج سب انسپکٹر مختار نے ایکسپریس کو بتایا کہ صنعتی ایریا میں خمیسہ پل پر تیز رفتار ریتی بجری کے ٹرک رجسٹریشن نمبر JT-4628 تیز رفتاری کے باعث آگے جانے والی موٹر سائیکل کو ٹکر مار دی۔

جس سے موٹر سائیکل سوار 25 سالہ فیضان ولد اسلام محمد موقع پر ہی ہلاک جبکہ اس کی بہن 18 سالہ عظمیٰ زخمی ہوگئی ، ہلاک و زخمی کو فوری طور پر عباسی شہید اسپتال منتقل کیا گیا ، ان کا کہنا تھا کہ متوفی سرجانی ٹائون سیکٹر 4-B کا رہائشی تھا ، خونی حادثہ دیکھ کر موقع پر موجود افراد مشتعل ہوگئے اور انھوں نے ٹرک کو نذر آتش کردیا ۔

حادثے کا ذمے دار ڈرائیور موقع سے فرار ہونے میں کامیاب ہوگیا ، پولیس نے واقعے کی تحقیقات شروع کردی ہے ، علاوہ ازیں اورنگی ٹائون میں ٹرک کی چھت سے گر کر کلینر ہلاک ہوگیا ۔

ایس ایچ او پیر آباد اشفاق بلوچ نے ایکسپریس کو بتایا کہ متوفی کی شناخت 40 سالہ عمران ولد علی خان کے نام سے ہوئی ہے جوکہ ٹرک کی چھت سے گر کر ٹرک کے پچھلے پہیوں میں آکر ہلاک ہوگیا ۔