کوہاٹ میں مسافر وین میں دھماکے سے 5 افراد جاں بحق 4 زخمی

2 روز قبل پشاوراور ہنگو میں بھی اسی نوعیت کے دھماکوں کے نتیجے میں 10 افراد زندگی کی بازی ہار گئے تھے۔ فوٹو: فائل

---

پشاور چوک پر مسافر وین میں دھماکے کے نتیجے میں 5افراد جاں بحق جبکہ 4 زخمی ہوگئے ہیں۔

ایکسپریس نیوز کے مطابق کوہاٹ کے پشاور چوک میں واقع بس اڈے میں نواحی علاقوں کو جانے والی ایک وین میں دھماکا ہوگیا جس کے نتیجے میں 4 افراد موقع پر ہی جاں بحق جبکہ 4 زخمی ہوگئے، زخمیوں کو فوری طورپر ڈسٹرکٹ اسپتال کوہاٹ منتقل کردیا گیا جہاں مزید ایک شخص جاں بحق ہو گیا جب کہ زخمیوں کو طبی امداد فراہم کی جارہی ہے، ڈاکٹرز کا کہنا ہے کہ دھماکے کی زد میں آنے والے کچھ زخمیوں کی حالت تشویشناک ہے۔

ڈی ایس پی سٹی کا کہنا ہے کہ مسافر وین میں موجود بم میں 5 کلو گرام بارودی مواد استعمال کیا گیا تھا جسے دہشت گردوں نے ریموٹ کنٹرول سے اڑایا، دھماکے سے 2 گاڑیاں تباہ ہوئی ہیں۔ پولیس نے کوہاٹ ہنگو روڈ کو مکمل طور پر بند کردیا ہے جبکہ مزید بارودی مواد کی موجودگی کے خدشے کے پیش نظر بس اڈے اور اطراف کے علاقے میں سرچ آپریشن بھی کیا جارہا ہے۔

واضح رہے 2 روز قبل پشاوراور ہنگو میں بھی اسی نوعیت کے دھماکوں کے نتیجے میں 10 افراد زندگی کی بازی ہار گئے تھے۔