دنیا کے بااثر ترین نوجوانوں میں قوم کی بیٹی ملالہ یوسف زئی بھی شامل

ملالہ یوسفزئی کو رواں برس امن کے نوبل انعام سے بھی نوازا جارہا ہے، فوٹو: فائل

---

امریکی جریدے نے دنیا کے بااثر ترین کم عمر افراد کی فہرست جاری کی ہے جن میں قوم کی بیٹی اور رواں برس امن کا نوبل انعام پانے والی ملالہ یوسف زئی بھی شامل ہیں۔

بین الاقوامی شہرت یافتہ جریدے''ٹائمز'' میں دنیا کے ان 25 بااثر ترین کم سن نوجوانوں کی فہرست جاری کی ہے جو ناصرف اپنے اپنے میدانوں میں انتہائی فعال ہیں بلکہ دنیا بھر کے نوجوانوں کے لئے اپنے عزم اور ہمت کے باعث مشعل راہ بھی ہیں، فہرست میں امریکی صدر براک اوباما کی 13 سالہ بیٹی ساشا اور 16 سالہ ملیا، 13 سالہ امریکی بیس بال کھلاڑی مونے ڈیوس،14 سالہ امریکی اداکارہ کیرنن شیپکا، نیوزی لینڈ کی 17 سالہ گلوکارہ لورڈ اور افغانستان کی قومی سائیکلنگ ٹیم کی کپتان سلمیٰ کاکڑ کے علاوہ ملک میں بچیوں کی تعلیم کے لئے طالبان کے سامنے علم جہاد بلند کرنے والی قوم کی بیٹی ملالہ یوسفزئی بھی شامل ہیں۔

واضح رہے کہ 17 سالہ ملالہ یوسفزئی کی جد و جہد پر انہیں رواں برس امن کے نوبل انعام سے بھی نوازا جارہا ہے۔