دفتر خارجہ کی جانب سے مختلف ممالک کے سفارتکاروں کو لائن آف کنٹرول اور ورکنگ باؤنڈری پر بھارتی فوج کی جنگ بندی کی خلاف ورزی سے پیدا ہونے والی صورتحال پر بریفنگ دی گئی اور تشویش کا اظہار کیا گیا۔
اسلام آباد میں بریفنگ کے دوران ملٹری آپریشنز ڈائریکٹوریٹ کے سینئر نمائندے نے سفارتکاروں کو بھارتی فوج کی جانب سے گزشتہ ماہ کی 30 تاریخ سے شروع ہونے والی بلاشتعال فائرنگ اور گولہ باری کی صورتحال سے آگاہ کیا اور شہریوں کی اموات اور زخمی افراد اور مالی نقصان کی تفصیلات بتائیں۔ انہوں نے بتایا کہ کنٹرول لائن اور ورکنگ باؤنڈری پر امن وامان کی بحالی کے لئے بھارت سے رابطہ کیا گیا لیکن دوسری جانب سے اس پر کوئی جواب نہیں دیا آیا۔
وزیراعظم کے نمائندہ خصوصی طارق فاطمی نے بھارتی دراندازی پر گہری تشویش کا اظہار کرتے ہوئے کہا کہ بھارت ورکنگ باؤنڈری پر جنگ بندی کی خلاف ورزی کرتے ہوئے پاکستانی علاقوں کو مسلسل نشانہ بنا رہا ہے۔ انہوں نے سفارتکاروں پر زور دیا کہ وہ اپنی حکومتوں کو موجودہ صورتحال سے آگاہ کریں اور بھارت پر دباؤ ڈالیں کہ وہ جنگ بندی کی خلاف ورزیاں روکے اور تمام تنازعات حل کرنے کے لئے پاکستان کے ساتھ بامعنی مذاکراتی عمل شروع کرے۔