نیپال میں ہمالیہ کے پہاڑ پر برفانی طوفان سے ہلاک ہونیوالے کوہ پیماوں کی تعداد 30 ہوگئی 152 کو بچا لیا گیا

150 سے زائد کوہ پیما اور گائیڈز ہمالیہ پہاڑ پر اپنی مہم پر روانہ ہوئے لیکن جلد ہی برفانی طوفان کی زد میں آگئے،حکام فوٹو:اے ایف پی

---

ہمالیہ کے پہاڑ پر برفانی طوفان کی زد میں آکر ہلاک ہونے والے کوہ پیماوں کی تعاداد 30 ہوگئی ہے جس میں 9 غیر ملکی بھی شامل ہیں جبکہ لاپتہ ہونے والوں میں سے 152 افراد بچا لیاگیا ہے۔

نیپالی حکام کے مطابق گذشتہ روز 200 سے زائد کوہ پیما اور گائیڈز ہمالیہ پہاڑ پر اپنی مہم پر روانہ ہوئے لیکن جلد ہی برفانی طوفان کی زد میں آگئے۔ حکام کے مطابق خراب موسم اور طوفان کےباعث بروقت امدادی کاروائیاں شروع نہ کی جاسکیں تاہم آج جب موسم کچھ بہتر ہوا تو فوری طور ریسکیو آپریشن شروع کردیا گیا اور اب تک 30 کوہ پیما کی لاشیں نکا لی جاچکی ہیں جب کہ 152 کو زندہ بچا لیا گیا جس میں 76 غیر ملکی ہیں تاہم ابھی بھی کچھ کوہ پیما لاپتہ ہیں۔ غیرملکیوں میں اسرائیل، کینیڈا اور بھارت کے کوہ پیما شامل ہیں۔

واضح رہے کہ اکتوبر کے مہینے میں موسم بہتر ہونے کی وجہ سے ہزاروں کوہ پیما نیپال کے راستے ہمالیہ کی پہاڑ کا رخ کرتے ہیں تاہم طوفان کے باعث موسم اچانک خراب ہوگیا اور کوہ پیماؤں کو بڑے جانی نقصان کا سامنا کرنا پڑا۔