ایف بی آر کے ماتحت اداروں کی کارکردگی کا جائزہ شروع

چیئرمین طارق باجوہ نے کل اسلام آباد اور راولپنڈی کے ایل ٹی یوو آر ٹی اوز حکام کو طلب کرلیا

Irshad Ansari October 16, 2014

پہلی سہ ماہی کی کارکردگی جانچی، عدم اطمینان پر کارروائی، سربراہان کے تبادلے ہونگے، ذرائع فوٹو: فائل

چیئرمین فیڈرل بورڈ آف ریونیو (ایف بی آر) نے تمام ماتحت اداروں کی رواں مالی سال کی پہلی سہ ماہی کی کارکردگی کا جائزہ لینے کا فیصلہ کیا ہے جس کے تحت ناقص کارکردگی کے حامل ماتحت اداروں کے سربراہان و ذمے داران کے خلاف کارروائی عمل میں لائی جائے گی اور انہیں تبدیل کردیا جائے گا۔

اس ضمن میں ''ایکسپریس'' کو دستیاب دستاویز کے مطابق چیئرمین فیڈرل بورڈ آف ریونیو نے مذکورہ پالیسی کے تحت جمعہ کو اسلام آباد اور جڑواں شہر راولپنڈی کے ریجنل ٹیکس آفسز و ایل ٹی یو کی ٹیموں کو طلب کرلیا ہے۔ دستاویز میں بتایا گیا کہ چیئرمین ایف بی آر طارق باجوہ کی زیرصدارت ایف بی آر ہیڈکوارٹرز میں اس جائزہ اجلاس میں نہ صرف لارج ٹیکس پیئر یونٹ اسلام آباد اور ریجنل ٹیکس آفس اسلام آباد و ریجنل ٹیکس آفس راولپنڈی کے چیف کمشنرز بلکہ کمشنرز کی ٹیم اور دیگر متعلقہ حکام بھی شرکت کے لیے آئیں گے۔

ذرائع کے مطابق اجلاس میں مذکورہ تینوں ماتحت اداروں کی رواں مالی سال کی پہلی سہ ماہی کی کارکردگی کا جائزہ لیا جائے گا جس کے بعد ملک کے دیگر ایل ٹی یوز اور آر ٹی اوز کی کارکردگی کا جائزہ لینے کے لیے بتدریج اجلاس بلائے جائیں گے۔

ذرائع کا کہنا ہے کہ جو ماتحت ادارے ٹیکس وصولیوں کے اہداف حاصل کرنے میں ناکام ہوں گے یا ان کی جوریزڈکشن میں آڈٹ کے کیس نمٹانے سے متعلقہ کارکردگی تسلی بخش نہیں ہوگی ان کے خلاف کارروائی عمل میں لائی جائے گی اور ان ماتحت اداروں کے سربراہاں کو تبدیل کردیا جائے گا، اس کے ساتھ ساتھ جو ماتحت ادارے اچھی کارکردگی کے حامل ہوں گے انہیں انعامات بھی دیے جائیں گے۔