حج آپریشن سو فیصد کامیاب رہا اخراجات کم ہوئے وزیر مذہبی امور

ٹور آپریٹرز سے ایک کروڑ روپے حجاج کو واپس دلوائے، کسی کو مفت حج نہیں کرایا، سردار یوسف

Numainda Express October 16, 2014

بہترین حج انتظامات حکومت کیلیے اعزاز ہے، وزیر اطلاعات کی میڈیا کو بریفنگ، 36 ہزار حجاج کرام وطن پہنچ گئے،واپسی جاری۔ فوٹو: فائل

وفاقی وزیرمذہبی امور سردار یوسف نے کہاہے کہ رواں سال حج آپریشن سو فیصد کامیاب رہا، گزشتہ سال کی نسبت اس سال پاکستانی حجاج کیلیے 51 ہزاراخراجات میں کمی لائی گئی جس کے باعث رواں سال حاجیوں کی صرف1400 شکایات سامنے آئیں جب کہ گزشتہ سال10ہزار شکایات وزارت کو موصول ہوئی تھیں۔

انھوں نے بتایا کہ اس سال 71 پاکستانی حاجیوں کی فریضہ حج کے دوران اموات واقع ہوئیں جن کے لواحقین کووزارت کی طرف سے5ل اکھ روپے فی کس فراہم کیے جائیں گے۔ وزیر اطلاعات پرویز رشیدکے ہمراہ حج آپریشن کے بارے میں میڈیا کو بریفنگ دیتے ہوئے سرداریوسف نے بتایا کہ آئندہ پاکستانی حجاج کو مزید سہولتیں فراہم کی جا ئیں گی، رواں سال جن نجی ٹورز آپریٹرز کے خلاف شکایات موصول ہوئیں ان سے ایک کروڑ روپے حجاج کو واپس دلوائے گئے، رواں سال کسی کو مفت حج نہیں کرایا گیا۔

اب تک پی آئی اے اور دیگر ایئر لائنز کے ذریعے36ہزار سے زائد پاکستانی فریضہ حج کی ادائیگی کےلئے وطن واپس پہنچ گئے ہیں۔ وزیر اطلاعات پرویز رشید نے کہاکہ حجاج کرام نے حج انتظامات پرجس اطمینان اور خوشی کا اظہار کیا ہے وہ حکومت کےلئے ایک اعزاز ہے، وزیراعظم نوازشریف دینی معاملات میں زیادہ حساسیت رکھتے ہیں، وزیراعظم نے حاجیوں کو ہر ممکن سہولتوں کی فراہمی کی ہدایت کی جس پر وزارت مذہبی امور نے عمل کیا۔