دشمنوں کو کہنا چاہتا ہوں کہ پاکستان سندھ اور کراچی ہمارا ہے بلاول بھٹو زرداری
سیاسی دجال اور طالبان نے ملک میں جو کچھ کیا وہ سب نے دیکھااورمیں طالبان سے ڈرنے والا نہیں،چیرمین پیپلزپارٹی
کراچی سندھ کے تاج کا ہیرا ہے جسے کوئی تقسیم نہیں کرسکتا، چیرمین پاکستان پیپلزپارٹی فوٹو: فائل
چیئرمین پیپلزپارٹی بلاول بھٹو زرداری کا کہنا ہے کہ کراچی اور حیدرآباد سندھ کے تاج کا ہیرا ہیں جنہیں کوئی تقسیم نہیں کرسکتا۔
ایکسپریس نیوز کے مطابق حیدرآباد کے دورے کے موقع پر بلاول بھٹو زرداری کا کہنا تھا کہ ہوش محمد شیدی نے سندھ کے دشمنوں کو للکارا اور مرسوں مرسوں سندھ نہ ڈیسوں کا نعرہ بلند کیا اور اسی نعرے کو بلند کرتے ہوئے دشمنوں کو کہنا چاہتا ہوں کہ پاکستان، سندھ اور کراچی ہمارا ہے اور خاص طور پر کراچی سندھ کے تاج کا کوہ نور ہے جسے الگ نہیں کیا جاسکتا۔ انہوں نے کہا کہ پیپلزپارٹی نے پنجاب میں کچھ نہیں کھویا بلکہ دھاندلی کے باعث اسے کم سیٹیں ملیں تاہم پارٹی اب بھی پنجاب کی سیاست میں اہم کردار ادا کر رہی ہے۔
چیئرمین پیپلز پارٹی کا کہنا تھا کہ سیاسی دجال اور طالبان نے ملک میں جو کچھ کیا وہ سب نے دیکھا۔ ان کا کہنا تھا کہ وہ طالبان سے ڈرنے والے نہیں بلکہ ان کا مقابلہ کروں گا۔