خیالی پلاؤ پہلا حصہ میری خواہش

تو تمیز سکھائے گا مجھے؟ سالے دو ٹکے کے چھوکرے ! الو کی دم! یہ کہتے ہوئے پولیس والے نے اکڑ دکھاتے ہوئے ریوالور تان لیا۔ فوٹو فائل

---

ٹرن ۔ ٹرن ۔ ٹرن !
دروازے پر گھنٹی متواتر بج رہی تھی ۔پر رافع کے کا ن پر جوں تک نہیں رینگی ۔
بھئی کون ہے ؟ رافع دروازے پر جا کر دیکھو کون آیا ہے ۔ مست آدمی اب اٹھ بھی جاؤ ۔
' اچھا جاتا ہونا بھائی ! اتنا غصہ کیوں ہو رہے ہیں ۔ صبح صبح رافع نے انگڑائی لیتے ہوئے کہا ' ضرور دودھ والا دودھ دینے آیا ہو گا ۔ رافع دودھ والے سے دودھ کی تھیلی لے کر فریج میں رکھ کر دوبارہ سونے چلاجاتا ہے ۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

افوہ ! اٹھ بھی جاؤنکمو ! نا شتہ تیا ر ہے ۔ جلدی جلدی ہا تھ منھ دھو کر آجاؤ ! امی نے آواز دیتے ہوئے کہا۔
امی آرہے ہیں بس پانچ منٹ اور ! رافع نے نیند میں کہا !
رافع اور زاہد دونوں بھائی تھے ۔
دونوں میں بے پناہ محبت اور ایک دوسرے کے لئے احترام تھا ۔ابو ٹیکسٹائل مل میں کا م کرتے تھے ۔ صبح نکلتے اورشام ڈھلے تک لوٹتے تھے۔دونوں بچوں کی ذمہ داری والدہ نے اٹھا رکھی تھی ۔دونوں کالج کے فرسٹ ائیر اور سیکنڈ ائیر کے اسٹوڈنٹس تھے ۔زاہد کتابی کیڑا تھا ۔ رافع کا ہوم ورک بھی زیادہ تر زاہد ہی کرکے دیتا تھا۔ رافع اکثر اسے چھیڑتا تھا کہ ' اتنا پڑھ کر کہیں آپ فلسفی نہ بن جائیں '۔
زاہد جواب دیتاکہ میں جاننا چاہتا ہوں کہ میری زندگی کا مقصد کیا ہے ؟ انسانیت کے رازوں کو جان پاؤں اور انسانیت کی خدمت کروں ، ساتھ ہی اپنے ملک کا نام روشن کروں۔ بڑا آدمی بن سکوں۔
پر میں اتنا بڑا آدمی نہیں بننا چاہتا ۔ ہا ہا ہا ! رافع ہنستے ہوئے کہتا ۔
آپ سے تو چھوٹا ہی رہنا چاہتا ہوں ۔
کیوں ؟
کیوں کہ میں آپ کی طرح پڑھاکو جو نہیں ہوں ۔جب آپ بڑے آدمی بن جائیں تو مجھے اپنا اسسٹنٹ رکھ لیجیے گا۔
رافع مسکراتے ہوئے جواب دیتا۔
دونوں بھائیوں میں اکثر اس طرح کی ہلکی پھلکی نوک جھونک ہو تی رہتی تھی۔ پورا محلہ ان کی محبت پر رشک کرتا اور اپنے بچوں کو بھی اُن جیسا بننے کی تلقین کرتا۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

بھائی آپ کا اسائمنٹ ورک ختم ہو گیا ؟
ہاں ! تقریباً ۔
تو پھر مجھے ریاضی کے کچھ سوالات سمجھا دیجیے ۔
اچھا آؤ ! بیٹھو یہاں۔
زاہد نے سوالات سمجھتے ہو ئے محسوس کیا کہ بھائی اس سے کچھ کہنا چاہتے ہیں پر کسی وجہ سے بات بد ل دیتے ہیں۔
رافع نے یہ نزاکت بھانپتے ہوئے کہا کہ بھا ئی آپ شاید کچھ کہنا چاہتے ہیں۔
نہیں کچھ خاص نہیں ۔ زاہد نے لا تعلقی ظاہر کرتے ہوئے کہا ۔
نہیں جی ! کچھ تو ہے جس کی پر دہ داری ہے ۔ رافع نے مسکراتے ہوئے کہا ۔
مجھے معلوم ہے تم اب بات جا ن کرہی چھوڑو گے ۔
معلوم ہے نا ؟ تو بتا دیجئے جلدی سے !
اچھا سنو ! پر تم مزاق تو نہیں اڑاؤ گے نا ؟
اب آپ میرا تجسس بڑھا رہے ہیں ۔ اچھا چلیں ، نہیں اڑاتا مزاق۔ بتائیں جلد ی سے !
میر کلاس میں ایک لڑکی ہے ۔ مریم نام ہے اس کا ۔ پتہ نہیں کیوں ، پر مجھے اس کو دیکھ کر لگتا ہے کہ مجھے کچھ ہو نے والا ہے ۔بہت اچھی لڑکی ہے وہ ۔ کلاس کے دوران بھی اُس سے نظریں ملتی رہتی ہیں اور وہ مجھے دیکھ کر مسکرانے لگتی ہے۔
اوہوووو ! تو سیدھی طرح سے بتائیے کہ عشق فرما رہے ہیں آپ اس سے ۔ رافع نے مسکراتے ہوئے کہا ۔
اوئے!یہ عشق وشق نہیں ہے جائل آدمی ۔
عشق نہیں ہے تو اور کیا ہے پھر؟ہوں،رافع نے چھیرتے ہوئے کہا
آہا !یعنی دونوں طرف ہے آگ برابر لگی ہوئی ۔۔ رافع نے ہنسنا شروع کر دیا ۔ زاہد نے اسے تکیہ دے مارا ۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

زندگی ایسے ہی رواں دواں تھی ۔ ہر طرف خوشحالی کا راج تھا ، پر ضروری نہیں کہ ہمیشہ وقت ایک سا رہے کبھی کبھی انسان کی زندگی میں ایسے موڑ بھی آتے ہیں کہ وہ دنگ رہ جا تا ہے ۔
زاہد کوچنگ جانے کی تیا ریوں میں مصروف تھا ۔ امی نے کہا بیٹا دھیان سے جانا۔ آج میرا دل کچھ پریشان سا ہے ۔
امی آپ فکر مند نہ ہوں ، روز ہی تو جا تا ہوں میں۔اللہ حافظ ! زاہد نے دروازے سے باہر نکلتے ہوئے جلدی سے کہا ۔
ابھی وہ بائیک لے کر کچھ ہی دور گیا تھا کہ اچانک پیچھے سے ایک کرخت آواز سنا ئی دی ۔
ابے اوے ! کہا ں جا رہا ہے ؟ رک! پولیس والے نے زاہد کو روکتے ہو ئے کہا
کوچنگ جا رہا ہو ں ۔ کیوں ؟
ادھر آ ! پڑھنے کا بچہ ۔ تیرے با پ کی سڑک ہے یہ ؟ نکال کا غذات ۔
میں نے کیا کر دیا؟ یہ کس لہجے میں بات کررہے ہیں آپ؟
زبان مت چلا ، چل کا غذات نکال ، ورنہ ۔۔۔ پولیس والے نے اس کا گریبا ن پکڑتے ہوئے کہا
زاہد کو پولیس والے سے اتنی بے ساختہ بدتمیزی کی امید نہ تھی۔
چھوڑیں میرا گریبان، اور تمیز سے بات کریں۔
تو تمیز سکھائے گا مجھے ؟ سالے دو ٹکے کے چھوکرے ! الو کی دم! یہ کہتے ہوئے پولیس والے نے اکڑ دکھاتے ہوئے ریوالور تان لیا اور زاہد کو دھکا دیا جس کی وجہ سے وہ منہ کے بل جاگرا
زاہد نے حواس با ختہ ہوتے ہوئے مزاحمت کرنی چاہی تو پولیس والے نے فائر کر دیا ، اور زاہد کا سفید سوٹ رنگین ہو گیا ۔ ایک ہی گولی نے زاہد سمیت اس کے تمام سپنوں کو بھی تاریکیوں کی نظر کر دیا ۔جب تک اسے اسپتال پہنچایا گیا ، اس کی زندگی کا چراغ اس سے پہلے ہی گل ہو چکا تھا ۔

(کہانی کا دوسرا حصہ آئندہ اتوار کو شائع کیا جائے گا)

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

نوٹ: روزنامہ ایکسپریس اور اس کی پالیسی کا اس بلاگر کے خیالات سے متفق ہونا ضروری نہیں ہے۔

اگر آپ بھی ہمارے لیے اردو بلاگ لکھنا چاہتے ہیں تو قلم اٹھائیے اور 500 سے 800 الفاظ پر مشتمل تحریر اپنی تصویر، مکمل نام، فون نمبر ، فیس بک اور ٹویٹر آئی ڈیز اوراپنے مختصر مگر جامع تعارف کے ساتھ [email protected] پر ای میل کریں۔ بلاگ کے ساتھ تصاویر اورویڈیو لنکس بھی بھیجے جا سکتے ہیں۔