شیخوپورہ کےصوبائی حلقے پی پی 162 کے ضمنی انتخاب میں پاکستان مسلم لیگ (ن) کے امیدوارحسان ریاض غیر سرکاری اور غیر حتمی نتائج کے مطابق کامیاب قرار پائے ہیں ۔
ایکسپریس نیوز کے مطابق مسلم لیگ (ن) کے رکن صوبائی اسمبلی محمد گلفام کے انتقال کے بعد خالی ہونے والی نشست پر ضمنی انتخاب کے دوران حکمران جماعت کے امیدوارحسان ریاض نے 39 ہزار 395 ووٹ جب کہ ان کے حریف آزاد امیدوار عثمان نثار نے 21 ہزار 418 ووٹ حاسل کئے، غیر سرکاری نتائج کا اعلان ہوتے ہی لیگی کارکنوں نے جیت کا جش منایا اورکافی دیر تک شدید ہوائی فائرنگ کرتے رہے جب کہ اس دوران مٹھائی بھی تقسیم کی گئی، آزاد امیدوار عثمان نثار کو پاکستان تحریک انصاف کی حمایت بھی حاصل تھی۔
ضمنی انتخاب میں پولنگ کے عمل کے دوران نارنگ منڈی میں مسلم لیگ (ن) اور آزاد امیدوار چوہدری عثمان کے حامیوں کے درمیان تصادم کے باعث ووٹنگ کچھ دیر کے لئے روک دی گئی تھی تاہم اس دوران رینجرز کی نفری نے جائے وقوعہ پر پہنچ کر حالات پر قابو پا لیا۔