بورڈ نے ثقلین مشاق سے معاہدے میں توسیع موخر کردی

سعید اجمل کا ٹیسٹ ہونے کے بعد آئندہ کا لائحہ عمل طے کیا جائے گا، سابق اسپنر

Sports Reporter October 24, 2014

سعید اجمل کو 10نومبر کو انگلینڈ بھجوایا جارہا ہے، رپورٹ آنے کے بعد کرکٹ کمیٹی جائزہ لے گی۔ فوٹو: فائل

پی سی بی کی کرکٹ کمیٹی نے ثقلین مشاق سے معاہدے میں توسیع سعید اجمل کے ایکشن کی رپورٹ آنے تک موخر کردی۔

''دوسرا'' کے موجد کی خدمات ایک ماہ کیلیے حاصل کی گئی تھیں،اس دوران انھوں نے نیشنل کرکٹ اکیڈمی لاہور میں سعید اجمل کا ایکشن درست کرنے کیلیے کام کیا، چند روز قبل چیئرمین پی سی بی نے کہا تھا کہ آف اسپنر کے بازو کا خم15ڈگری کی قانونی حد کے قریب آچکا ہے،بدھ کو اطلاعات سامنے آئیں کہ ابھی2 ہفتے مزید کام کی ضرورت ہوگی،گذشتہ روز بورڈ کی پریس ریلیز میں بتایا گیا کہ نجی طورپر ایکشن کا جائزہ لینے کیلیے سعید اجمل کو 10نومبر کو انگلینڈ بھجوایا جارہا ہے، رپورٹ آنے کے بعد کرکٹ کمیٹی جائزہ لے گی کہ آف اسپنر کیساتھ کام کرنے کیلیے ثقلین مشاق کی مزید کتنے عرصے تک خدمات حاصل کرنے کی ضرورت ہے۔

دوسری جانب ثقلین مشتاق جمعے کی صبح انگلینڈ واپس روانہ ہو جائینگے، انھوں نے نمائندہ ''ایکسپریس'' سے بات چیت کرتے ہوئے کہا کہ لوبرو میں سعید کے غیر سرکاری بولنگ ایکشن ٹیسٹ کے بعد آئندہ کا لائحہ عمل طے کیا جائیگا، وہ انگلینڈ کی میری اکیڈمی میں بھی بہتری کی کوشش جاری رکھیںگے، ثقلین نے کہا کہ میری واپسی کی وجہ چند دیگر مصروفیات ہیں، اسے کسی اور معاملے سے جوڑنا درست نہ ہوگا۔