ایبولا وائرس میں مبتلا شخص کا پتہ چلانے کیلئے خصوصی موبائل فون سوفٹ ویئرمتعارف

اس بات کی اشد ضرورت تھی کہ ایک ایسا سسٹم بنایا جائے جو فوری ایبولا سے متاثرہ افراد سے براہ راست رابطہ ممکن بنائے،موبائل فون کمپنی۔ فوٹو فائل

---

ایبولا کی تباہ کاریوں سے پوری دنیا پریشان ہے اوراس بیماری سےمتاثرہ افراد کی تعداد میں مسلسل اضافہ ہورہا ہے جب کہ مریض تک فوری پہنچنا بھی ایک مسئلہ ہے تاہم اب اس مسئلے کا حل نکال لیا گیا ہے اور موبائل فون میں ایسا سوفٹ وئیر متعارف کرادیا گیا ہے جو اس بیماری سے متاثرہ شخص کے بارے میں نہ صرف آگاہ کرے گا بلکہ اس کی درست لوکیشن بھی واضح کرے گا۔

موبائل فون کمپنیوں کے تعاون سے ایبولا سے متاثرہ علاقوں کے لوگوں کو یہ سہولت فراہم کی جارہی ہے کہ وہ ایبولا سے متاثرہ شخص کے بارے میں مفت پیغامات ارسال کریں جس سے اس سوفٹ ویئر کی مدد سے نقشہ یہ بتائے گا کہ یہ متاثرہ مریض کس علاقے میں موجود ہے، اس سہولت کی بدولت مریض کو زیادہ تیزرفتاری ادویات کی فراہمی ممکن ہوسکے گی جبکہ اگر کوئی شخص اس بیماری سے انتقال کرگیا ہے تو اس کی لاش کو فوری طور پر اسپتال پہنچایا نے کے ساتھ آخری رسومات کی ادائیگی بھی بروقت کی جاسکے گی۔

موبائل کمپنیوں کا دعویٰ ہے کہ اس سسٹم میں موجود نقشوں کی بدولت ایبولا سے متاثرہ علاقے کی نہ صرف لوکیشن پتہ چلتی ہے بلکہ وہاں کی ضرورت کا بھی پتہ چلتا ہے جو ہیلتھ ورکرز اور حکومت کو اس بیماری کے خلاف اقدامات کرنے میں مدد فراہم کرتا ہے۔ کمپنی کے افریقا میں ریسرچ چیف کا کہنا تھا کہ اس بات کی اشد ضرورت تھی کہ ایک ایسا سسٹم بنایا جائے جو فوری ایبولا سے متاثرہ افراد سے براہ راست رابطہ ممکن بنائے لہذا اس سسٹم کی بدولت اس بیماری کا شکار لوگوں تک براہ راست رابطہ ممکن ہوا ہے۔

واضح رہے کہ اس بیماری سے مغربی افریقا میں اب تک 10 ہزار سے زائد افراد متاثر ہو چکے ہیں اور اس نے دنیا کے کئی دوسرے ممالک کو بھی اپنی لپیٹ میں لے رکھا ہے۔