پاکستان فلم انڈسٹری کی بحالی کا خواب اب پورا ہوتا نظر آرہا ہے اداکارندیم

سینئرز کو چاہیے کہ وہ نئے آنے والوں اور اچھا کام کرنے والوں کی حوصلہ افزائی کریں تاکہ بہتر سے بہتر کام ہوسکے،سپراسٹارندیم فوٹو: فائل

---

سینئر اداکار ندیم نے کہا کہ پاکستان فلم انڈسٹری کی بحالی کا خواب اب پورا ہوتا نظر آرہا ہے اوراس کے لئے نوجوان اپنا کردار ادا کررہے ہیں جس پر ہمیں ان پر فخر ہے۔


اداکارندیم نے کہا کہ عید پر ریلیز ہونے والی فلموں کی کامیابی کے بعد ہم سب اس بات سے خوش ہیں کہ آنے والے وقت میں اچھی اور معیاری فلمیں بنتی رہیں گی اور ماضی کی طرح ایک بار پھر پاکستان کی فلمی صنعت عروج پر نظر آئے گی۔ انہوں نے کہا کہ اچھے موضوعات اچھی کہانی فلم کی کامیابی میں اہم کردار ادا کریں گی، سینئرز کو چاہیے کہ وہ نئے آنے والوں اور اچھا کام کرنے والوں کی حوصلہ افزائی کریں تاکہ بہتر سے بہتر کام ہوسکے

سپراسٹار کا کہنا تھا جدید ٹکنالوجی وقت کی ضرورت ہے اور کوشش کی جانی چاہیے کہ ہم جدید سہولیات سے فائدہ اٹھائیں تاکہ ہماری فلمیں بھی دنیا کی مارکٰیٹ میں جگہ بناسکیں۔ ان کا کہنا تھا کہ ہم سب کی خواہش تھی کہ فلم انڈسٹری کی رونقیں بحال ہوں اور نوجوانوں نے اپنی محنت اور لگن سے فلم انڈسٹری کی بحالی میں اہم کردارادا کرتے ہوئے ہم سب کی خواہش کو پورا کردیا جس پر ہمیں ان پر فخر ہے۔