عمران خان پارلیمنٹ میں واپس آئیں انہیں گلے لگائیں گے پرویز رشید

اگر دھرنے نہ ہوتے تو پٹرول 14 روپے تک سستا ہوچکا ہوتا، وفاقی وزیر اطلاعات

ویب ڈیسک November 01, 2014

داعش ایک دہشت گرد تنظیم کا نام ہے اور اس کے علاوہ کچھ نہیں، پرویز رشید، فوٹو:فائل

وفاقی وزیر اطلاعات پرویز رشید کا کہنا ہےکہ صبح کا بھولا شام کو گھر آجائے تو اسے بھولا نہیں کہتے لہٰذا عمران خان بھی پارلیمنٹ میں واپس آجائیں ہم انہیں گلے لگائیں گے۔

اسلام آباد میں میڈیا سے بات کرتے ہوئے وزیراطلاعات سینیٹر پرویز رشید نےکہا کہ وزیراعظم نے پٹرول کی قیمت کرکے عوام کی بہتری کے لیے اہم فیصلہ کیا ہے اگر دھرنے نہ ہوتے تو پٹرول 14 روپے تک سستا ہوچکا ہوتا لیکن وفاقی حکومت نے پھر بھی قیمت کم کی اب عمران خان بتائیں وہ خیبرپختونخوا میں عوام کو کیسے ریلیف دیں گے۔ انہوں نےکہا کہ عمران خان نے اپنی ٹیم کو حکومت سے مذاکرات کی اجازت نہیں دی، عمران خان شاہ محمود قریشی کی ہتھکڑی کھول دیں۔

پرویزرشید نے کہا کہ تحریک انصاف اپنے لوگوں کو انصاف دینا نہیں چاہتی، عمران خان جس حلقے سے منتخب ہوئے ہیں کیا اب تک وہاں گئے ہیں جبکہ وہ سوچیں کہ ان کی سیاست پاکستان کو کیا نقصان پہنچا رہی ہے لیکن صبح کا بھولا اگر شام کو گھر آئے تو اسے بھولا نہیں کہتے اس لیے عمران خان بھی پارلیمنٹ میں واپس آئیں ہم انہیں گلے لگائیں گے۔ ان کاکہنا تھا کہ داعش ایک دہشت گرد تنظیم کا نام ہے اور اس کے علاوہ کچھ نہیں اور ہم نام سے نہیں دہشت گردوں سے جنگ کررہے ہیں جبکہ داعش نے تو آج دہشت گردی شروع کی ہے ہم تو کئی سالوں سے اس کا شکار ہیں۔