قادری کے بعد عمران کو بھی آخرکار دھرنا ختم کرنا پڑے گا جاوید ہاشمی

احتجاجی دھرنوں سے ملکی نظام کی تبدیلی ممکن نہیں ہوسکتی، اس کے لیے پارلیمنٹ میں بات کرناہوگی، جاوید ہاشمی

INP November 03, 2014

امپائر کی انگلی کے اشارے کا انتظار کرنے والوں کو مایوسی کے سوا کچھ نہیں ملے گا، جاوید ہاشمی۔ فوٹو: فائل

KARACHI: (ن) لیگ اورتحریک انصاف کے سابق رہنما جاوید ہاشمی نے کہاہے کہ طاہرالقادری کے بعدعمران خان کو بھی آخرکار احتجاجی دھرنا ختم کر نا پڑے گا۔ جمہوریت کے خاتمے اور امپائر کی انگلی کے اشارے کا انتظار کرنے والوں کو مایوسی کے سواکچھ نہیں ملے گا،ملک میں مارشل لا کا کوئی خطرہ نہیں، وفاقی اورصوبائی حکو متیں مدت پوری کرتیں نظرآرہی ہے۔

ایک انٹرویو میں جاوید ہاشمی نے کہاکہ میں نے بہت دیرپہلے سے کہہ دیا تھا کہ احتجاجی دھرنوں سے ملکی نظام کی تبدیلی ممکن نہیں ہوسکتی، اس کے لیے پارلیمنٹ میں بات کرناہوگی اور طاہرالقادری نے احتجاجی دھرنا ختم کرکے موجودہ نظام کے تحت ہی انتخابات میں حصہ لینے کابھی اشارہ دیدیا ہے، مجھے لگتاہے کہ آخرکارعمران خان کوبھی احتجاج دھرناختم کرکے پارلیمنٹ میں ہی آکر بات کر نا پڑیگی کیونکہ احتجاجی دھرنوں سے کچھ تبدیل نہیں ہوگا بلکہ عوام مسائل میں اضافہ ہی ہوگا۔

انھوں نے کہاکہ میں محض سیاسی میدان کاباغی نہیں،خاندانی روایات سے بھی بغاوت کی ہے اورآئندہ بھی ملک اورقوم کیلیے آواز بلند کرتا رہوں گا جس کیلیے ہرقربانی دینے کو تیار ہوں، میں نے مارشل لا کی سازش کو ناکام بناکر جمہوریت کیلیے جو قربانی دی اس کا فیصلہ آنے والے دنوں میں تاریخ خود کرے گی، کچھ حلقوں میں تاثر پایا جاتا ہے ضمنی الیکشن میں ہارجانے کے بعد میرا سیاسی کیریئر ختم ہوچکا لیکن ایسا نہیں ہوسکتا آنے والا وقت بتائے گا کون کیاہے۔