اکتوبر میں مہنگائی 17 ماہ کی کم ترین سطح پر آگئی

ایندھن اور خوردنی اشیا کی قیمت میں کمی کے باعث افراط زر کی شرح 5.82 فیصد پر آگئی، ستمبر میں 7.68 تھی

Business Reporter November 06, 2014

مہنگائی میں جولائی تا اکتوبر 7.09 فیصد اضافہ، رواں مالی سال انفلیشن ریٹ 7.8 فیصد تک رہنے کا امکان ہے، ماہرین۔ فوٹو: فائل

مہنگائی کے مارے عوام کے لیے اکتوبر کا مہینہ نسبتاً بہتر رہا، اکتوبر میں کنزیومر پرائس انڈیکس 5.82 فیصد زائد رہا جو گزشتہ 17 ماہ میں سی پی آئی میں اضافے کی کم ترین شرح قرار پائی ہے، ستمبر کے مہینے میں سی پی آئی میں 7.68 فیصد جبکہ اکتوبر 2013 میں 9.08 فیصدکا اضافہ ریکارڈ کیا گیا تھا۔

مہنگائی کے سرکاری اعدادوشمار میں بہتری کی وجہ ایندھن اور خوردنی اشیا کی قیمت میں کمی قرار دی جارہی ہے۔ اعدادوشمار کے مطابق رواں مالی سال کے پہلے4 ماہ (جولائی تااکتوبر) کے دوران سی پی آئی کی اوسط شرح 7.09 فیصد رہی جو گزشتہ مالی سال کے اسی عرصے میں اوسط 8.32 فیصد ماہانہ رہی تھی۔ پٹرولیم مصنوعات کی قیمت میں حالیہ کمی کے بعد افراط زر کا دبائو بھی کم رہنے کی توقع ہے۔

حکومت نے رواں مالی سال افراط زر کے لیے8 فیصد کا ہدف رکھا ہے تاہم ماہرین کا کہنا ہے کہ افراط زر کی شرح 7.8 فیصد یعنی حکومتی ہدف سے بھی کم رہے گی۔