خیالی پلاؤ تیسرا حصہ میری خواہش

لڑکے کوچنگ سینٹر سے نکل رہے تھے، رافع نے ایک کی طرف اشارہ کرتے ہوئے پولیس آفیسر کو کہا کہ اس پر فائرنگ کر دو۔ فوٹو اے پی

---

ISLAMABAD: رافع اسپتال میں تھا۔ اس کی حالت دن بدن بگڑتی جا رہی تھی ۔ ایک دن میڈیا والے اس اسپتال میں سروے کے لئے آئے اور ہر مریض سے اس کی خواہش دریافت کرنے لگے ۔کوئی مریض کسی مشہور شخصیت سے ملنے کی فرمائش کرتا تو کوئی اسپتال سے باہر گھومنے کی فرمائش کرتا۔مریضوں کی چھوٹی چھوٹی فرمائشوں سن کر رپورٹر کی آنکھوں میں آنسو آجاتے۔

جب چینل والے رافع کے پاس آئے اور اس سے اس کی کوئی دیرینہ خواہش پوچھی تو رافع نے جواب دیا کہ میں ایک دن کے لئے ڈی ایس پی بننا چاہتا ہوں ۔ کیا آپ میری یہ خواہش پوری کریں گے ؟
ٹی وی چینل والوں نے کہا کہ ہم پوری کوشش کریں گے کہ آپ کی اس خواہش کا احترام کیا جائے ۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

آج رافع کی وہ دیرینہ خواہش صرف اس لئے پوری کر دی گئی تھی کہ کیونکہ اس کے پاس بہت کم ٹائم رہ گیا تھا۔ اعلیٰ حکام نے اس کی بیماری کو مد نظر رکھتے ہوئے صرف ایک دن کے لئے اسے یہ عہدہ دے دیا تھا۔ ڈی ایس پی اکرام نے اپنی سیٹ رافع کو دیتے ہوئے کہا کہ تم کو ایک دن کے لئے ڈی ایس پی تعینا ت کیا جا رہا ہے ۔مجھے امید ہے تم یہ فرض بخوبی نبھاؤ گے ۔
رافع نے اقرار میں سر ہلا دیا ۔
اب اس کی آنکھیں اس پولیس انسپکٹر کی متلاشی تھیں جس کی وجہ سے اس کا ہنستا بستا گھر اجڑ چکا تھا۔ اس نے اس پولیس انسپکٹر کو طلب کیا اور کہا۔
گلبرگ روڈ کے لئے گاڑی نکالو، فوراََ
پولیس انسپکٹر چونکہ اس کی موجودہ پوزیشن سے واقف تھا لہذا اسے اپنے آفیسر کا حکم ماننا ہی پڑا۔
ایک جگہ پررافع نے گاڑی رکوا دی ،سامنے سے کچھ لڑکے کوچنگ سینٹر سے نکل رہے تھے ۔ رافع نے ایک کی طرف اشارہ کرتے ہوئے کہا کہ اس پر فائرنگ کر دو۔
پولیس انسپکٹر نے حیران کن نظروں سے رافع کی جانب دیکھا اور کہا ، یہ کیسے ہو سکتا ہے ، یہ میرا بیٹا ہے ، میں اس پر گولی کیسے چلا سکتا ہوں ؟
با لکل ایسے ہی ، جیسے تم نے میرے بھائی پر گولی چلائی تھی۔ کیا قصور تھا اس کا؟
پولیس انسپکٹر کو سارا معاملہ سمجھ آ گیا ۔ اس کو اپنے اندر کچھ ٹوٹتا ہوا محسوس ہوا
تم نے صرف ایک انسان کی جان نہیں لی بلکہ پورے خاندان کی زندگیوں کو تبا ہ کر ڈالا ہے ۔ رافع کی حالت بہت خراب ہو چکی تھی۔ انسپکٹر کو اپنی غلطی کا بہت شدت سے احساس ہوگیا تھا۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

پولیس انسپکٹر نے خود کو قانون کے حوالے کر دیا۔ میڈیا پر بھی یہ خبر متواتر نشر کی جا رہی تھی۔ سعد کو جب پتہ چلا تو وہ اپنے والد سے ملنے تھانے گیا ۔
پاپا !یہ سب کیا ہے؟
ہاں بیٹا میں نے خود اپنے آپ کو قانون کے حوالے کردیا ہے، میں اسی قابل ہوں، میں نے معصوم بچے کی جان لی ،میرا ضمیر مجھے سکون سے نہیں رہنے دے گا۔میں پوری سزا کاٹ کر ہی آؤں گا۔بیٹا اس فرشتے سے میری طرف سے معافی مانگ لینا۔ شاید خدا بھی مجھے معاف کردے۔
سعد کا دماغ بھائیں بھائیں کرنے لگا۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

سعد جلدی جلدی میں رافع سے ملنے بھاگا۔سارے راستے اس کا دل تیزی سے دھڑک رہا تھا۔
جب وہ محلہ پہنچا تو گھر کے باہر ٹینٹ لگے ہوئے تھے،سعد خالی قدموں سے آگے بڑھنے لگا۔
بیٹا تم اگئے!دیر کردی آنے میں،رافع جانے سے پہلے تمہارا ہی انتظار کرتا رہا۔ رافع کی والدہ نے کہا اور رونے لگی۔
سعد وہیں کھڑا کا کھڑا رہ گیا۔

مرکزی خیال؛ انسان کی معمولی غلطی بعض اوقات پورا خاندان اجاڑ دیتی ہے۔ پتہ نہیں لوگ کیسے دوسروں کی زندگیوں کو تباہ کرکے سوری جیسا لفظ کہہ کر بری الزمہ ہوجاتے ہیں اور احساس ندامت ان کو کبھی پریشان نہیں کرتا ۔

حادثہ سے بڑا سانحہ یہ ہوا
کوئی رکا نہیں حادثہ دیکھ کر

نوٹ: روزنامہ ایکسپریس اور اس کی پالیسی کا اس بلاگر کے خیالات سے متفق ہونا ضروری نہیں ہے۔

اگر آپ بھی ہمارے لیے اردو بلاگ لکھنا چاہتے ہیں تو قلم اٹھائیے اور 500 سے 800 الفاظ پر مشتمل تحریر اپنی تصویر، مکمل نام، فون نمبر ، فیس بک اور ٹویٹر آئی ڈیز اوراپنے مختصر مگر جامع تعارف کے ساتھ [email protected] پر ای میل کریں۔ بلاگ کے ساتھ تصاویر اورویڈیو لنکس بھی بھیجے جا سکتے ہیں۔