ڈومیسٹک کرکٹ سعید اجمل کے ایکشن میں نظر آنے کا امکان

انگلینڈ میں نجی ٹیسٹ کا کل نتیجہ سامنے آئے گا،کامیابی پر اجازت مل جائے گی

Sports Reporter November 13, 2014

پاکستان کرکٹ بورڈ آئی سی سی سے آفیشل جانچ کی درخواست بھی کرے گا فوٹو: فائل

پاکستانی جادوگر اسپنر سعید اجمل کے ڈومیسٹک کرکٹ میں ایکشن میں نظر آنے کا امکان روشن ہو گیا، بولنگ ایکشن کے تجزیے کا نتیجہ جمعے کو برآمد ہوگا، لفبرا میں غیرسرکاری ٹیسٹ کے حوصلہ افزا نتائج ملنے کی صورت میں پاکستان کرکٹ بورڈ آئی سی سی سے آفیشل جانچ کی درخواست کرے گا۔

تفصیلات کے مطابق پاکستانی اسٹار آف اسپنر سعید اجمل کا بولنگ ایکشن سری لنکا کیخلاف سیریز میں مشکوک قرار دیا گیا تھا، بعدازاں انھیں آسٹریلیا میں انٹرنیشنل باڈی کی جانب سے ٹیسٹ کا سامنا کرنا پڑا جس میں وہ ناکام ہوئے اور ان پر کرکٹ کے دروازے بند کردیے گئے۔

پی سی بی نے آئی سی سی کے فیصلے کو قسمت کا لکھا سمجھ کر قبول کرنے کے بجائے ایکشن میں درستگی کے مشن پر کام شروع کیا، اس کیلیے مایہ ناز اسپنر ثقلین مشتاق کی خدمات حاصل کی گئیں۔''دوسرا'' کے موجد نے اسپنر کی میدان میں واپسی یقینی بنانے کیلیے سخت محنت کی، بعدازاں ان کی طرف سے تسلی بخش رپورٹ موصول ہونے کے بعد پی سی بی حکام نے سعید اجمل کو انگلینڈ بھیجنے کافیصلہ کیا جہاں انھوں نے10 نومبر کو غیرسرکاری ٹیسٹ دیا، اس کی رپوٹ جمعے کو ملے گی۔ذرائع کے مطابق اگر سعید اجمل کا بولنگ ایکشن کلیئر ہوجاتا ہے تو بورڈ انھیں ڈومیسٹک کرکٹ کھیلنے کی اجازت دیدے گا، بعد ازاں آئی سی سی سے ایکشن ٹیسٹ کیلیے درخواست کی جائے گی۔