ماضی کی غلطیوں کو بھلا کر اپنے فلمی کیرئیر کو آگے بڑھاؤں گا سیف علی خان

بالی ووڈ اداکار سیف علی خان کا کہنا ہے کہ فلم 'ہیپی اینڈنگ' کے ذریعے وہ اپنی ماضی کی غلطیوں کو بھلا کر دوبارہ سے اپنے کیرئیر کو آگے بڑھائیں گے۔

بھارتی میڈیا رپورٹس کے مطابق سیف علی خان کا کہنا تھا کہ انہوں نے ماضی میں چیزوں کا غلط اندازہ لگایا لیکن اب شاندار طریقے سے اپنی واپسی کے لئے کمرشل کامیابی کے بجائے اچھے اسکرپٹ کو ترجیح دے رہا ہوں۔ ان کا کہنا تھا کہ ماضی میں اپنی فلموں 'بلٹ راجہ' اور 'ہمشکلز' کے ذریعے سے کچھ مختلف کرنے کا سوچا تھا کیونکہ میں نے اس سے قبل ایسا کردار ادا نہیں کیا تھا لیکن میں نے یہ محسوس کیا ہے کہ میں نے ایسا کرکے غلطی کی تھی اور لوگ مجھ سے اچھی فلموں کی توقع کرتے ہیں اور مجھے پتہ ہے کہ میں ایک اچھا اداکارہوں۔


سیف علی خان نے کہا کہ اپنی فلم 'ہیپی اینڈنگ' سے ایک بار پھر اچھی فلموں کی جانب جا رہا ہوں اور میرے چاہنے والوں کو ایک بار پھر 'گو گوا گون' اور 'اومکارا' جیسی اچھی فلمیں دیکھنے کو ملیں گی۔ اب میں کوالٹی پر کوئی سمجھوتہ نہیں کروں گا، میں نے ' ہیپی اینڈنگ ایک اچھی رومانوی کامیڈی فلم ہے اور میں نے اس فلم میں خود کو دوبارہ سے منوایا ہے اور اس فلم میں میرا کردار جاندار ہے۔

واضح رہے کہ سیف علی خان کی فلم 'ہیپی اینڈنگ' میں گوندا اور الینا ڈی کروز بھی پرفارم کر رہی ہیں۔