کراچی سے بازیاب 20 بچیاں باجوڑ میں والدین کے حوالے کردی گئیں

بچیوں کے حوالے سے اصل تحیقیقات کراچی پولیس نے کرنی ہے، اعظم خان۔ فوٹو؛ ایکسپریس نیوز

---

کراچی کے مختلف علاقوں سے بازیاب ہونے والی 36 میں سے 20 بچیاں باجوڑ میں ان کے والدین کے حوالے کردی گئیں۔

ایکسپریس نیوز کے مطابق کراچی سے بازیاب 36 میں سے 20 بچیوں کو پولیٹیکل ایجنٹ فاٹا کے سپرد کیا گیا جہاں سے انہیں خصوصی طیارے کے ذریعے پہلے پشاور اور پھر باجوڑ ایجنسی کے ہیڈ کوارٹر خار بھجوادیا گیا، جہاں ایڈیشنل سیکرٹری فاٹا اعظم خان نے پولیٹیل ایجنٹ کی موجودگی میں انہیں ان کے والدین کے سپرد کردیا۔

واضح رہے کہ 4 روز قبل کراچی پولیس نے مختلف علاقوں سے 36 بچیوں کو بازیاب کرایا تھا جن میں زیادہ تعداد باجوڑ کی بچیوں کی تھی۔ بازیاب کرائی گئی 15 بچیوں کو کراچی میں ہی ان کے والدین کے حوالے کر دیا گیا تھا جب کہ پنجاب سے تعلق رکھنے والی بچی کو بھی واقعے کے اگلے ہی روز اس کے والدین کے حوالے کر دیا گیا تھا۔