وزیراعظم نااہلی کیس میں اٹارنی جنرل اور درخواست گزاروں کو نوٹسز جاری

سپریم کورٹ کے 3 رکنی بینچ نے آئین کے آرٹیکل 62اور 63کی تشریح کے لئے معاملہ چیف جسٹس کو بھجوایا تھا فوٹو: فائل

---

سپریم کورٹ نے وزیراعظم نااہلی کیس میں درخواست گزاروں اور اٹارنی جنرل کو 8 دسمبر کو پیش ہونے کے نوٹس جاری کردیئے ہیں۔

ایکسپریس نیوز کے مطابق سپریم کورٹ کا 7 رکنی لارجر بینچ 8 دسمبر کو وزیراعظم نواز شریف کی نااہلی کے لئے دائر درخواستوں کی سماعت کرے گا، بنچ کی سربراہی چیف جسٹس پاکستان جسٹس ناصر الملک کریں گے، اس سلسلے میں سپریم کورٹ نے درخواست گزاروں اسحاق خاکوانی، گوہر نواز سندھو، چوہدری شجاعت اور اٹارنی جنرل آف پاکستان سلمان اسلم بٹ کو نوٹس جاری کردیئے ہیں۔

واضح رہے کہ سپریم کورٹ کے 3 رکنی بینچ نے آئین کے آرٹیکل 62 اور 63 کی تشریح کے لئے معاملہ چیف جسٹس کو بھجوایا تھا کہ وہ لارجر بینچ تشکیل دیں، جس پر چیف جسٹس آف پاکستان نے اپنی سربراہی میں سات رکنی لارجر بینچ قائم کیا ہے۔