سری لنکا نے دوسرے ون ڈے میں انگلینڈ کو ہنستے کھیلتے 8 وکٹوں سے شکست دیدی

سری لنکا نے ہدف ہنستے کھیلتے2وکٹ پرعبورکرلیا،سنگاکارااورجے وردنے کی ففٹیز ۔ فوٹو : اے ایف پی

---

سلو ٹریک پر انگلش بیٹنگ پٹری سے اتر گئی،سری لنکا کیخلاف دوسرے ون ڈے میںٹیم 180رنز پر ڈھیر ہوگئی، روی بوپارا(51)اور جوئے روٹ(42)کے سوا کوئی مزاحمت نہ کرپایا،اجنتھا مینڈس نے3 وکٹیں لیں، میزبان سائیڈ نے ہدف ہنستے کھیلتے 2 وکٹ پر عبور کرلیا،سنگاکارا67 اورجے وردنے77 پر ناقابل شکست رہے۔

تفصیلات کے مطابق کولمبو میں صبح دھند کی وجہ سے میچ کو45،45 اوورز تک محدود کردیا گیا، انگلینڈ کی ٹیم سلو پچ پر ابتدا میں ہی مشکلات کا شکار ہوگئی، گذشتہ میچ کے سنچری میکر معین علی صرف2رنز بناکر دلشان کی گیند پر بولڈ ہوئے، 150 واں ون ڈے کھیلنے والے ای این بیل11رنز کے مہمان ثابت ہوئے،رنگانا ہیراتھ نے انھیں میدان بدر کرنے کیلیے تشارا پریرا سے معاونت حاصل کی، کپتان الیسٹر کک اعتماد سے عاری 22رنز بنانے کے بعد دلشان کی گیند پر کوشل پریرا کو کیچ دے بیٹھے، ایون مورگن(17) کو پریرا نے تھریمانے کی مدد سے چلتا کردیا،جوئے روٹ نے روی بوپاراکے ساتھ مل کر اسکور117تک پہنچایا،کپتان انجیلو میتھیوز نے انھیں 42 پر آئوٹ کرکے شراکت کا خاتمہ کیا۔

جوز بٹلر(7) کی بیلز فضا میں بکھیر کر دھمیکا پرساد نے انگلینڈ کو چھٹا نقصان پہنچایا، کرس ووکس نے اجنتھا مینڈس کی گیند پر سنگاکارا کو کیچ تھما کر 15پر وکٹ کی قربانی پیش کر دی، ایسے میں بوپاراکے صبر کا پیمانہ بھی لبریز ہوگیا،انھوں نے 51رنز بنانے کے بعد اسپنر کی گیند میتھوز کی طرف اچھال دی، مینڈس نے اسٹیون فن کو کھاتہ کھولنے سے قبل ہی بولڈ کیا، ہیری گورنے ایک رن ہی بنا پائے تھے کہ دھمیکا پرساد نے وکٹیں اڑادیں،مہمان ٹیم 43 اوورز میں صرف 185رنز پر ڈھیر ہوگئی۔

اجنتھا مینڈس3 جبکہ دلشان اور دھمیکا پرساد 2،2 وکٹیں لینے میں کامیاب ہوئے۔ جواب میں سری لنکا کو27کے مجموعی اسکور پر کوشل پریرا(9) کا نقصان اٹھانا پڑاا، انھیں فن نے بوپاراکا کیچ بنوایا، صرف 10رنز کے اضافے سے دلشان(26)بھی معین اور کرس ووکس کے گٹھ جوڑ کا شکار ہوگئے،اسکے بعد سنگاکارا ایک ڈراپ کیچ سے فائدہ اٹھاتے ہوئے67 رنز بنانے میں کامیاب رہے، مین آف دی میچ جے وردنے نے77 کی اننگز کھیلی، دونوں نے35ویں اوور میں ہی ٹیم کو ہدف تک پہنچا دیا۔