اسلامی بینکاری پالیسی کا مسودہ رواں ماہ فائنل کرنے کا فیصلہ

رپورٹ کی روشنی میں آئندہ سال نئی اسلامک بینکنگ پالیسی متعارف کرائی جائیگی، ذرائع۔ فوٹو: فائل

---

وفاقی حکومت نے رواں ماہ کے آخر تک اسلامی بینکاری پالیسی کے مسودے کو حتمی شکل دینے کا اصولی فیصلہ کیا ہے۔

''ایکسپریس'' کو دستیاب دستاویز کے مطابق حکومت نے فیصلہ کیا ہے کہ آئندہ سال اسلامک بینکنگ کو فروغ دینے کیلیے نئی پالیسی متعارف کرائی جائے گی جس کے لیے حکومت کی طرف سے خصوصی کمیٹی قائم کی گئی اور رواں سال کے آخر تک سفارشات پر مبنی رپورٹ تیار کرنے کی ہدایت کی گئی تھی۔ دستاویز کے مطابق وزارت خزانہ کی طرف سے قائم کردہ مذکورہ کمیٹی میں ملک کے معروف بینکارز، علما، معیشت دانوں اور اعلی حکومتی حکام کو شامل کیا گیا ہے اور اس کمیٹی کو ٹاسک دیا گیا ہے کہ اسلامک بینکنگ کے فروغ کیلیے سفارشات تیار کی جائیں تاکہ ملک میں مالیاتی نظام کو اسلامی بنایا جاسکے۔

ذرائع نے بتایا کہ مذکورہ کمیٹی 31 دسمبر تک سفارشات پر مبنی رپورٹ کو حتمی شکل دے کر پیش کریگی جس کے تناظر میں نئی اسلامک بینکنگ پالیسی متعارف کرائی جائے گی۔ ذرائع نے بتایا کہ وفاقی حکومت ملک میں سود سے پاک بینکاری نظام متعارف کرانا چاہتی ہے جس کیلیے اسلامی بینکاری کے فروغ کیلیے کام جاری ہے۔