عمران خان نے پورے ملک کو یرغمال بنا رکھا ہے آفتاب شیر پاؤ

قومی وطن پارٹی کے سربراہ آفتاب احمد خان شیرپاؤ نے کہا ہے کہ عمران خان نے پورے پاکستان کو بند کرنے کی دھمکی دی ہے کیا پاکستان کسی کے باپ کی جاگیر ہے۔


مانسہرہ میں پارٹی کے ورکرز کنونشن سے خطاب کرتے ہوئے آفتاب شیرپاؤ کا کہنا تھا کہ خیبر پختونخوا میں پاکستان تحریک انصاف کی حکومت عوامی مسائل حل کرنے اور صوبے کی ترقی پر توجہ نہیں دے رہی، عمران خان نے فیصل آباد، لاہور، کراچی اور پورے پاکستان کو بند کرنے کی دھمکی دی ہے جب کہ انہوں نے پوری قوم کو یرغمال بنا رکھا ہے، کیا پاکستان کسی کے باپ کی جاگیر ہے۔ ان کا کہنا تھا کہ پی ٹی آئی والے انصاف کی بات کرتے ہیں لیکن کیا انہوں نے ہمارے ساتھ انصاف کیا، ہمارے وزرا پر کرپشن کے الزامات تو لگائے گئے لیکن کوئی ثبوت پیش نہیں کیا گیا۔

آفتاب شیرپاؤ کا کہنا تھا کہ کنٹینروالے شورمچاتے ہیں کہ انتخابات میں دھاندلی ہوئی، اگر انتخابات میں دھاندلی ہوئی ہے تو جوڈیشل کمیشن میں جائیں وہ فیصلہ کرے گا کہ انتخابات میں دھاندلی ہوئی یا نہیں لیکن عمران خان جوڈیشل کمیشن پرکبھی راضی نہیں ہوں گے۔