کراچی کے مختلف علاقوں سے 2 لاشیں برآمد

دونوں افراد نشے کے عادی تھے، پولیس فوٹو: فائل

---

شہر قائد کے مختلف علاقوں سے 2 افراد کی لاشیں ملی ہیں جنہیں قریبی اسپتال میں منتقل کردیا گیا ہے۔

ایکسپریس کے مطابق آرام باغ کے علاقے پاکستان چوک سٹی ٹریفک پولیس سیکشن سے متصل کچرا کنڈی سے40 سالہ شخص کی لاش ملی، اطلاع ملنے پر پولیس موقع پر پہنچ گئی اور لاش کو تحویل میں لے کر قانونی کارروائی کے بعد لاش ایدھی سرد خانے منتقل کردی، پولیس کا کہنا ہے کہ متوفی کے پاس سے ایسی کوئی چیز نہیں ملی جس سے اس کی شناخت کی جا سکے، متوفی کے جسم پر چوٹ یا تشدد کے نشانات نہیں تھے ، متوفی حلیے سے نشے کا عادی لگتا تھا، شبہ ہے کہ نشے کی زیادتی یا نشہ نہ ملنے سے اس کی موت واقع ہوئی ہے۔

لیاقت آباد سپر مارکیٹ کے قریب تین ہٹی پل کے نیچے لیاری ندی سے 45سالہ شخص کی لاش ملی ، اطلاع ملنے پر پولیس موقع پر پہنچ گئی اور لاش کو تحویل میں لے کر عباسی شہید اسپتال پہنچایا، پولیس کا کہنا ہے کہ متوفی نشے کا عادی تھا جو نشے کی زیادتی سے ہلاک ہو گیا، متوفی کی لاش پولیس کارروائی کے بعد ایدھی سرد خانے روانہ کر دی گئی ۔