نیپرا نے بجلی کی قیمتوں میں 2 روپے 97 پیسے کمی کی منظوری دے دی

بجلی کی قیمتوں میں کمی کا اطلاق کے الیکٹرک کے سوا تمام تقسیم کار کمپنیوں پر ہو گا۔ فوٹو: فائل

---

نیشنل الیکٹرک پاور ریگولیٹری اتھاڑی (نیپرا) نے بجلی کی قیمتوں میں 2 روپے 97 پیسے فی یونٹ کمی کی منظوری دے دی ہے۔

ایکسپریس نیوز کے مطابق نیپرا حکام کی جانب سے جاری بیان میں کہا گیا ہے کہ بجلی کی قیمتوں میں 2 روپے 97 پیسے فی یونٹ کمی کی منظوری دے دی گئی ہے، بجلی کی فی یونٹ قیمت میں کمی فیول ایڈجسٹمنٹ کی مد میں کی گئی۔ نیپرا حکام کے مطابق صارفین کو بجلی کی قیمتوں میں کمی کا فائدہ نومبر کے بلوں سے ہو گا تاہم اس کمی کا اطلاق کے الیکٹرک کے سوا تمام تقسیم کار کمپنیوں پر ہو گا۔

واضح رہے کہ چند روز قبل وزیراعظم نواز شریف نے بھی بجلی کی قیمتوں میں 2 روپے 32 پیسے کمی کا اعلان کرتے ہوئے ایک بار پھر اپنے دور حکومت میں لوڈ شیڈنگ کے خاتمے کا عہد دہرایا تھا۔