شاہ رخ اورعامر کے ساتھ فلم میں کام کرنے سے بہترہے کہ شادی کرلوں سلمان خان

میری جگہ بگ باس کے آٹھویں ایڈیشن کی میزبانی ہدایتکارہ فرح خان کریں گی، سلمان خان۔ فوٹو: فائل

---

بالی ووڈ کے دبنگ خان کا کہنا ہے کہ 2015 میں شاہ رخ خان اور عامر خان کے ساتھ فلم میں کام کرنے سے زیادہ اپنی شادی کوترجیح دوں گا۔

بھارتی میڈیا رپورٹس کے مطابق 'بگ اسٹار انٹر ٹینمنٹ ایوارڈ 2014' کی تقریب میں جب سلمان خان سے پوچھا گیا کہ وہ 2015 میں شاہ رخ خان اورعامر خان کے ساتھ فلم میں کام کرنا پسند کریں گے یا اپنی شادی کو ترجیح دیں گے تو اس پر دبنگ خان نے برجستہ کہا کہ وہ دونوں خانز کے ساتھ فلم میں کام کرنے سے زیادہ اپنے آپ کو شادی شدہ دیکھنا پسند کریں گے۔ ان کا کہنا تھا کہ اگر 3 خان ایک ساتھ ہوں گے تو وہ صرف ارباز خان، سہیل خان اور سلمان خان ہوں گے اس کے علاوہ کوئی اورنہیں۔

سلمان خان کا اپنے رئیلٹی شو بگ باس کے حوالے سے کہنا تھا کہ اپنی فلمی مصروفیت کے باعث جنوری سے بگ باس کے آٹھویں ایڈیشن کی میزبانی نہیں کر سکوں گا اور اس حوالے سے انتظامیہ کو پہلے ہی آگاہ کر چکا تھا۔ انہوں نے کہا کہ میری جگہ بگ باس کے آٹھویں ایڈیشن کی میزبانی ہدایت کارہ فرح خان کریں گی۔