متحدہ قومی موومنٹ کی جانب سے لال مسجد کے خطیب مولانا عبدالعزیز کی جانب سے الطاف حسین کو بذریعہ ویڈیو مبینہ دھمکی دینے پر شدید احتجاج کیا۔
کراچی پریس کلب کے باہر ایم کیو ایم کے سیکڑوں کارکنان نے جمع ہوکر لال مسجد کے خطیب مولانا عبدالعزیز کے خلاف احتجاج کیا جب کہ اس موقع پرخطاب کرتے ہوئے حیدرعباس رضوی نے کہا کہ خطیب لال مسجد کی جانب سے ایم کیو ایم قائد الطاف حسین کو قتل کی دھمکی دینے پر کارکنان تشویش میں مبتلا ہیں لیکن انہیں بتا دینا چاہتے ہیں کہ کوئی الطاف حسین کا بال بھی بیکا نہیں کرسکتا، کراچی پورے پاکستان کو چلاتا ہےاور ملکی معاشی حب ہے اس لئے ایسا کوئی کام نہ کیا جائےجس سے شہرکو چلانا مشکل ہوجائے۔ انہوں نے کہا کہ علما شائستہ ہوتے ہیں مگر مولانا عبدالعزیز نے جن کے کروڑوں چاہنے والے ہیں ان کے خلاف بازاری زبان استعمال کی جب کہ 20 ہزار افراد اب بھی ایسے ہیں جو کسی بھی وقت اپنے قائد کے لئے جان اور مال لٹانے کے لئے تیار ہیں۔
اس موقع پر فیصل سبزواری نے کہا کہ یہ کوئی پہلاموقع نہیں جب الطاف حسین کو کسی کی جانب سے قتل کی دھمکی دی گئی ہو، ہمارے قائد کوایسےشخص نےدھمکی دی ہےجس کےکردارسےسب واقف ہیں اور اب وقت آگیا ہے کہ پاکستان بچانا ہے تو دہشت گردوں کا خاتمہ ضروری ہے۔ انہوں نے کہا کہ ایم کیو ایم فوج اورسیکیورٹی اہلکاروں کےساتھ کھڑی ہے اور ہم کراچی سے خیبر تک تمام پاکستانیوں کے ساتھ ہیں اور رہیں گے۔