سینٹرل جیل کی سیکیورٹی غوثیہ کالونی خالی کرانے پر مکینوں کا احتجاج

سینٹرل جیل کے عقب میں قائم غوثیہ کالونی خالی کرانے کا فیصلہ کرلیا گیا

Raheel Salman December 22, 2014

آپریشن کا مقصد رہائشیوں کے کوائف معلوم کرنا اور سب سے بڑھ کر یہ معلوم کرنا تھا کہ کہیں کوئی شرپسند عناصر کسی کے گھر مہمان کی صورت میں تو موجود نہیں ہیں، پولیس حکام فوٹو: آن لائن

سیکیورٹی خدشات کے باعث ملیرجیل میں قائم اسٹاف کالونی میں پولیس نے سرچ آپریشن کیا، اس دوران گھر گھر تلاشی لی گئی، جیل کی سیکیورٹی بڑھاکر اضافی نفری تعینات کردی گئی ہے جبکہ جیل کے گرد پولیس کے گشت میں اضافہ کردیا گیا ہے۔

تفصیلات کے مطابق ملک بھر میں پھانسی کی سزا پر عملدرآمد کے بعد ڈسٹرکٹ جیل ملیر کی سیکیورٹی بھی بڑھادی گئی ہے، اس سلسلے میں سیکیورٹی خدشات پر ہفتہ اور اتوار کی درمیانی شب شاہ لطیف ٹاؤن پولیس نے جیل کے گرد حصار بناکر اسٹاف کالونی میں سرچ آپریشن کیا، سرچ آپریشن میں کمانڈوز نے بھی حصہ لیا، اس دوران نقل و حرکت پر مکمل طور پر پابندی لگادی گئی، سرچ آپریشن کے دوران اسٹاف کالونی میں قائم تمام گھروں کی تلاشی لی گئی تاہم کوئی مشتبہ چیز برآمد نہیں ہوئی۔

پولیس حکام کا کہنا ہے کہ سیکیورٹی خدشات کی وجہ سے کیے گئے آپریشن کا مقصد رہائشیوں کے کوائف معلوم کرنا اور سب سے بڑھ کر یہ معلوم کرنا تھا کہ کہیں کوئی شرپسند عناصر کسی کے گھر مہمان کی صورت میں تو موجود نہیں ہیں تاہم آپریشن کے دوران ایسا کوئی شخص نہیں ملا۔

پولیس حکام نے مزید بتایا کہ ملک بھر کی جیلوں کی طرح ڈسٹرکٹ جیل ملیر کی سیکیورٹی میں بھی اضافہ کردیا گیا ہے اور پولیس کی ضافی نفری تعینات کردی گئی ہے ، جیل کے گرد پولیس کے گشت میں اضافہ کردیا گیا ہے جبکہ کمانڈوز بھی تعینات کیے گئے ہیں ، حکام نے مزید بتایا کہ پولیس کسی بھی ناخوشگوار واقعے سے نمٹنے کے لیے پوری طرح تیار ہے جبکہ پولیس کو جدید اسلحہ بھی فراہم کردیا گیا ہے۔