پنجاب کے تعلیمی اداروں میں دہشتگردی سے نمٹنے کیلئے رضاکارفورس کی تیاری

KARACHI:
وزیر تعلیم و کھیل پنجاب رانا مشہود کہتے ہیں کہ صوبے بھر کے تعلیمی اداروں میں دہشتگردی سے نمٹنےکے لئے 3 لاکھ رضاکاروں پر مشتمل خصوصی فورس تشکیل دی جارہی ہے۔


پنجاب اسمبلی میں میڈیا سے بات کرتے ہوئے وزیرتعلیم و کھیل پنجاب کا کہنا تھا کہ وفاقی حکومت نے پہلے طالبان کی بات سنی پھر ضرب عضب آپریشن شروع کیا گیا لیکن دہشتگردی سے نمٹنا صرف حکومتوں کا کام نہیں، دہشتگردی کے خلاف قوم ایک جگہ اکٹھی ہے، سیاسی جماعتوں کو متحد ہونا ہے۔

رانا مشہود کا کہنا تھا کہ پنجاب کے تمام تعلیمی اداروں میں حفاظتی اقدامات کویقینی بنایاجارہا ہے، دہشتگردی سے نمٹنے کے لئے 3 لاکھ رضاکاروں پر مشتمل خصوصی فورس تشکیل دی جارہی ہے جو صوبے بھر کے تعلیمی اداروں میں دہشتگردی کے خلاف کام کرے گی۔