پاکستانی نژاد برطانوی باکسر عامر خان نے اپنا ٹائٹل شہدائے پشاور کے نام کردیا
دکھ کی اس گھڑی میں متاثرہ خاندان کے ساتھ ہوں اور اگرپاکستان کو بچوں کی تعلیم کیلئے خدمات کی ضرورت پڑی تو حاضرہوں،باکسر۔ فوٹو؛فائل
پاکستانی نژاد برطانوی باکسر عامر خان نے سلور لائٹ ویلٹر ویٹ ٹائٹل پشاور کے شہدا کے نام کردیا۔
اسلام آباد میں پریس کانفرنس کرتے ہوئے پاکستانی نژاد باکسرعامر خان کا کہنا تھا کہ پاكستان دہشت گردی كے خلاف جنگ لڑ رہا ہے اور مشكل كی اس گھڑی ميں قوم كا ساتھ دينے آيا ہوں ، پاكستان ميں تعليم اور ترقی كے ميدان ميں ہر ممكن مدد كيلئے ہر وقت تيارہوں ، پوري دنيا كو بتانا چاہتاہوں كہ پاكستان ايك محفوظ ملك ہے۔ انہوں نے کہا کہ وہ دکھ کی اس گھڑی میں متاثرہ خاندانوں کے ساتھ ہیں اگر پاکستانی حکومت کو بچوں کی تعلیم کے لئے ان کی خدمات کی ضرورت پڑیں تو وہ اس کے لئے ہر وقت تیار ہیں۔
پاکستانی نژاد باکسر نے حال ہی میں امریکی باکسر ڈیوون الیگزینڈر کو شکست دے کر جیتا گیا سلور لائٹ ویلٹر ویٹ ٹائٹل بھی شہدا پشاور کے نام کردیا جب کہ اس سے قبل انہوں نے 30 ہزار پاؤنڈ مالیت کا سونے کا شارٹ آرمی پبلک اسکول کے شہدا کے لواحقین کو دینے کا اعلان کیا تھا۔
واضح رہے کہ پاکستانی نژاد برطانوی باکسر عامر خان نے 14 دسمبر کو امریکا کے شہر لاس ویگاس میں امریکی حریف ڈیوو الیگزینڈر کو شکست دے کر سلور لائٹ ویلٹر ویٹ ٹائٹل اپنے نام کیا تھا اور اسی فائٹ میں انہوں نے 30 ہزار پاؤنڈ مالیت کا سونے سے بنا شارٹ پہنا تھا۔