حصص مارکیٹ میں منافع کا حصول 86 پوائنٹس کی کمی

انڈیکس 31907 پوائنٹس پر بند، 219 کمپنیوں کی قیمتیں گرگئیں، سرمایہ کاروں کو 17 ارب روپے کا نقصان

Business Reporter December 30, 2014

21 کروڑ50 لاکھ حصص کا لین دین، انویسٹرز کاروباری ترجیحات کے لیے نئے سال کے منتظر ہیں، ماہرین۔ فوٹو: آن لائن/فائل

نئے تقویمی سال سے قبل حصص کی تجارتی سرگرمیاں محدود رہنے اور بیشتر شعبوں کی پرافٹ ٹیکنگ پر رحجان غالب ہونے کے باعث کراچی اسٹاک ایکس چینج میں پیر کو اتارچڑھاؤ کے بعد مندی کے اثرات غالب رہے جس سے60.16 فیصد حصص کی قیمتیں گرگئیں جبکہ سرمایہ کاروں کے17 ارب 9 کروڑ 65 لاکھ 32 ہزار 892 روپے ڈوب گئے۔

ماہرین اسٹاک کا کہنا تھا کہ محدود تجارتی سرگرمیوں کے باوجود پی اوایل اور اینگرو فرٹیلائزر سے متعلق بعض مثبت اطلاعات کی وجہ سے خریداری رحجان دیکھنے میں آیا جس کی وجہ سے مارکیٹ میں بڑی نوعیت کی مندی رونما نہ ہوسکی۔ ماہرین کا کہنا تھا کہ سرمایہ کاری کے بیشترشعبہ جات نئے تقویمی سال کے آغاز کے منتظر ہیں تاکہ وہ نئے سال کے لیے اپنے کاروباری ترجیحات کا تعین کرسکیں۔

ٹریڈنگ کے دوران غیرملکیوں، بینکوں ومالیاتی اداروں اور انفرادی سرمایہ کاروں کی جانب سے مجموعی طور پر59 لاکھ 78 ہزار 153 ڈالر مالیت کی تازہ سرمایہ کاری کے نتیجے میں ایک موقع پر83.1 پوائنٹس کی تیزی سے انڈیکس کی 32000 پوائنٹس کی نفسیاتی حد بحال ہوگئی تھی لیکن اس دوران مقامی کمپنیوں کی جانب سے 24 لاکھ 55 ہزار550 ڈالر، میوچل فنڈز کی جانب سے 9 لاکھ87 ہزار591 ڈالر، این بی ایف سیز کی جانب سے5 لاکھ 2 ہزار516 ڈالر اور دیگر آرگنائزیشنز کی جانب سے25 لاکھ 32 ہزار 496 ڈالر مالیت کے سرمائے کے انخلا کی وجہ سے تیزی مندی میں تبدیل ہوگئی۔

کاروبار کے اختتام پر کے ایس ای100 انڈیکس 86.27 پوائنٹس کی کمی سے31906.74 ہوگیا جبکہ کے ایس ای30 انڈیکس56.79 پوائنٹس کی کمی سے 20722.90 اور کے ایم آئی30 انڈیکس185.85 پوائنٹس کی کمی سے 50501.02 ہوگیا، کاروباری حجم گزشتہ جمعہ کی نسبت 1.17 فیصد زائد رہا اور مجموعی طور پر 21 کروڑ50 لاکھ 87 ہزار200 حصص کے سودے ہوئے جبکہ کاروباری سرگرمیوں کا دائرہ کار 364 کمپنیوں کے حصص تک محدود رہا جن میں 123 کے بھاؤ میں اضافہ، 219 کے داموں میں کمی اور22 کی قیمتوں میں استحکام رہا۔