ذکی الرحمان لکھوی نے اغوا کے مقدمے میں 2 روزہ جسمانی ریمانڈ کو چیلنج کردیا

ذکی الرحمان لکھوی پر ممبئی حملہ کیس میں ملوث ہونے کا الزام ہے۔ فوٹو: فائل

---

MANCHESTER: ممبئی حملہ کیس کے ملزم ذکی الرحمان لکھوی نے اپنے خلاف اغوا کے مقدمے میں جسمانی ریمانڈ کو عدالت میں چیلنج کردیا ہے۔

اسلام آباد کی ایڈیشنل اینڈ سیشن جج زیبا چوہدری کی عدالت میں ذکی الرحمان لکھوی کے جسمانی ریمانڈ کے خلاف درخواست کی سماعت ہوئی، سماعت کے دوران ذکی الرحمان لکھوی کے وکیل نے موقف اختیار کیا کہ ان کا موکل گزشتہ 6 برس سے جیل میں ہے ایسی صورت میں وہ کسی کو اغوا نہیں کرسکتا۔ ان کا کہنا تھا کہ بھارتی حکام کا دعویٰ ہے کہ ان کے دباؤ پر ذکی الرحما ن لکھوی کو رہا نہیں کیا جارہا، كيا آئين پاكستان اپنے شہريوں كے حقوق كا تحفظ نہيں كر سكتا، عدالت سے استدعا ہے کہ میرے موکل ذکی الرحمن لکھوی کے ریمانڈ کا حکم معطل کیا جائے۔

فریقین کے دلائل سننے کے بعد عدالت نے قرار دیا کہ ریمانڈ کا حکم معطل نہیں کیاجاسکتا کیوں کہ یہ ایک حساس معاملہ ہے اور اس میں سب کو سننا پڑے گا، تفتیشی افسر مدعی مقدمہ سے رابطہ کر کے عدالت کو آگاہ کرے، کیس کی مزید سماعت جمعرات کو ہوگی۔

واضح رہے کہ گزشتہ روز پولیس نے اغوا کے مقدمے میں ذکی الرحمان لکھوی کا 2 روزہ جسمانی ریمانڈ لیا تھا۔