ارکان پارلیمنٹ کی دہری شہریت غیر ملکی سفارتخانوں سے رابطہ کیا جائے گا چیف الیکشن کمشنر

چیف الیکشن کمشنر فخر الدین جی ابراہیم نے ارکان پارلیمنٹ کی دہری شہریت کے حوالے سے غیر ملکی سفارتخانوں سے رابطہ کرنے کا فیصلہ کیا ہے۔

چیف الیکشن کمشنر جسٹس ریٹائرڈ فخرالدین جی ابراہیم نے ایکسپریس نیوز سے گفتگو کرتے ہوئے کہا کہ الیکشن کمیشن دہری شہریت رکھنے والے ارکان پارلیمنٹ کے خلاف کارروائی جاری رکھے گا۔ انہوں نے کہا کہ قومی اسمبلی اور سینیٹ سیکریٹریٹ کی جانب سے دہری شہریت رکھنے والے ارکان کے حوالے سے ریکارڈ فراہم نہ کرنا مایوس کن ہے۔

فخرالدین جی ابراہیم نے کہا کہ وزارت خارجہ، وزارت داخلہ اور سمندر پار پاکستانیوں کی وزارت نے ابھی تک اس حوالے سے الیکشن کمیشن کے خط کا جواب نہیں دیا اس لئےغیر ملکی سفارتخانوں کو خطوط لکھنے کا فیصلہ کیا گیا ہے اور وزارت خارجہ سے اس سلسلے میں دوبارہ رابطہ کیا جائے گا۔