دہشتگردوں کا نشانہ بننے والا آرمی پبلک اسکول بھی 26 روز بعد کھل گیا جہاں چیف آف آرمی اسٹاف جنرل راحیل شریف نے اپنی اہلیہ کے ہمراہ اسکول کا دورہ کیا۔
جنرل راحیل شریف نے بچوں کے ساتھ اسمبلی میں شرکت کرتے ہوئے قومی ترانہ پڑھا اور دعا بھی کی۔ اس موقع پر آرمی چیف نے بچوں کے جذبے کو سراہتے ہوئے کم عمر طالبعلموں اور ان کے والدین سے ملاقات کی جب کہ طالبعلموں اور ان کے والدین نے سیکیورٹی کی صورتحال پر اطمینان کا اظہار کرتے ہوئے تعلیم کے فروغ کو جاری رکھنے کے عزم کا اظہار کیا۔
واضح رہے کہ دہشتگردوں کی جانب سے پشاور کے آرمی پبلک اسکول پر 16 دسمبر کو حملہ کیا گیا تھا جس کے دوران 132 بچوں سمیت 144 افراد شہید ہوگئے تھے۔