جاپان کی حکومت نے تاوان نہ دیا تو اس کے دونوں شہریوں کوقتل کردیں گے داعش

ویڈیو کے اصل ہونے کی تصدیق کی جارہی ہے جس کے بعد ہی اس بارے میں کچھ کہا جاسکتا ہے،جاپانی حکام فوٹو : اے ایف پی

---

جنگجو تنظیم داعش نے وڈیو جاری کی ہے جس میں دو جاپانی شہریوں کو یرغمال دکھایا گیا ہے اور ان کی رہائی کے بدلے میں جاپانی حکومت سے 200 ملین ڈالر تاوان کا مطالبہ کیا گیا۔

غیر ملکی خبررساں ادارے کے مطابق شام اور عراق میں سرگرم جنگجو تنظیم داعش نے منگل کو انٹرنٹ پر ایک وڈیو جاری کی ہے جس میں دو افراد کو گھٹنوں کے بل بیٹھا ہوا دکھایا گیا اور کہا گیا ہے کہ یہ دونوں افراد جاپان کے شہری ہیں۔ وڈیو میں نقاب پوش شخص خنجر تھامے کھڑا انگریزی زبان میں جاپان کی حکومت سے مخاطب ہوکر کہہ رہا ہے کہ اگر اس نے 72 گھنٹوں کے اندر 200 ملین ڈالر ادانہیں کئے تو اس کے دونوں شہریوں کو قتل کردیا جائے گا۔

ویڈیو کے منظر عام پر آنے کے بعد جاپان کے وزیراعظم جو ان دنوں مشرقی وسطیٰ کے 6 روزہ دورے کے سلسلے میں مقبوضہ بیت المقدس میں ہیں، اپنے ایک بیان میں داعش کے اس اقدام کی شدید الفاظ میں مذمت کرتے ہوئے کہا کہ داعش کی یہ حرکت ناقابل قبول ہے اور اپنے شہریوں کی حفاظت کے لئے تمام ضروری اقدام کئے جائیں گے تاہم جاپانی حکام کا کہنا ہے کہ وہ وڈیو کی اصل ہونے کی تصدیق کررہے ہیں۔

واضح رہے کہ چند روز قبل جنگجو تنظیم داعش کے خلاف کارروائیاں کرنے والے ممالک کے لیے جاپان کے وزیراعظم نے 20 کروڑ ڈالر دینے کا اعلان کیا تھا۔