بلاول کو 4 اپریل سے قبل منانے کیلئے آصف زرداری پھرسرگرم

بلاول بھٹوزرداری کواپریل کی تقریب کے لیے ضرورآنا چاہیے، پارٹی رہنماؤں کا سابق صدر کو مشورہ

ملک سعید اعوان January 23, 2015

بلاول ملکی سیاست اور پارٹی معاملات میں اپنے والد کے قریبی رشتے داروں کی ضرورت سے زیادہ مداخلت پرنالاں ہیں۔ فوٹو: فائل

KARACHI: پاکستان پیپلزپارٹی کے چیئرمین بلاول بھٹوزرداری کے اپنے والدآصف زرداری سے اختلافات کی خبروں کے بعدمرکزی قیادت 4اپریل کو ذوالفقارعلی بھٹوکی برسی میں شرکت کے لیے بلاول بھٹوزرداری کوملک واپس لانے کے لیے سرگرم ہوگئی۔

پارٹی کی اکثریت نے آصف زرداری کوپیغام دیاہے کہ بلاول بھٹوزرداری کواپریل کی تقریب کے لیے ضرورآنا چاہیے، اس سے افواہیں دم توڑ جائیں گی۔ بلاول بھٹوزرداری ملکی سیاست میں سابق صدرآصف زرداری کی قریبی رشتے دارکی ضرورت سے زیادہ پارٹی معاملات میں مداخلت کرنے اوران کے پارٹی چلانے پرنالاں ہیں۔ پیپلزپارٹی کے باوثوق ذرائع کے مطابق پیپلزپارٹی کی قیادت نے ایک بارپھر بلاول بھٹوزرداری کواپریل تک منانے کی کوششیں تیز کردی ہیں تاکہ وہ پارٹی میں اپنی سرگرمیاں دوبارہ شروع کریں۔ اس سے قبل بھی اعلیٰ قیادت محترمہ بینظیربھٹو کے یوم شہادت کے پرانھیں منانے کے لیے کوشش کرچکی ہے جوکامیاب نہیں ہوئی۔

سابق صدرآصف زرداری خودبرطانیہ گئے مگربلاول نہیں مانے۔ آصف زرداری اور پارٹی کی اعلیٰ قیادت دوبارہ بلاول کومنانے کے لیے سرگرم ہوگئی ہے۔ ذرائع کے مطابق بلاول بھٹوسندھ حکومت میں بھی بڑے پیمانے پرتبدیلیوں کے خواہاں ہیں۔