دو میچز پر مشتمل سیریز کا پہلا میچ کل پاکستانی وقت کے طابق صبح 6 بجے ویلنگٹن کھیلا جائے گا۔ فوٹو:فائل
پاکستان اور نیوزی لینڈ کے درمیان 2 میچز پر مشتمل ون ڈے سیریز کا پہلا میچ کل ویلنگٹن میں کھیلا جائے گا۔
نیوزی لینڈ کی جونیئر ٹیم سے 2 وارم اپ میچز میں شکست کے بعد کل قومی ٹیم ویلنگٹن میں کیویز سے ٹکرائے گی جب کہ میچ پاکستانی وقت کے مطابق صبح 6 بجے شروع ہوگا۔ مصباح الیون کی جانب سے ورلڈ کپ سے قبل کیوز کے خلاف دونوں میچز جیتنے کے لئے سخت پریکٹس کی گئی جب کہ نیوزی لینڈ بھی پاکستان کو ہرا کر ورلڈ کپ میں فاتح کی حیثیت سے اترنا چاہتا ہے۔
قومی ٹیم اسکواڈ میں کپتان مصباح الحق، احمد شہزاد، محمد حفیظ، یونس خان، حارث سہیل، سرفراز احمد، شاہد آفریدی، عمر اکمل، وہاب ریاض، محمد عرفان، بلاول بھٹی، سہیل خان، احسان عادل، صہیب مقصود اور یاسر شاہ شامل ہیں جب کہ نیوزی لینڈ کی جانب سے برینڈم میکولم ٹیم کی قیادت کریں گے اور دیگر کھلاڑیوں میں کوری اینڈریسن، ٹرینٹ بولڈ، گرینٹ ایلیٹ، مارٹن گبٹل، ٹام لیتھم، مچل میکلیگن، نیتھن میکولم، کائل ملز، ایڈم ملنے، لیوک رونچی، ٹم ساؤتھی، روس ٹیلر، ڈینئل ویٹوری اور کین ولیمسن شامل ہیں۔