کراچی میں سی آئی ڈی کی کارروائی گینگ وار کا اہم ملزم ہلاک

ملزم کی گرفتاری پر 5 لاکھ روپے انعام مقرر کیا گیا تھا۔ فوٹو:فائل

---

سی آئی ڈی پولیس نے مواچھ گوٹھ میں کارروائی کے دوران گینگ وار کے اہم ملزم کو ہلاک کرنے کا دعویٰ کیا ہے۔

ایکسپریس نیوز کے مطابق سی آئی ڈی پولیس نے کراچی کے علاقے مواچھ گوٹھ میں چھاپہ مارا جس پر علاقے میں موجود ملزم نے پولیس ٹیم پر فائرنگ کردی جس کے بعد پولیس کی جوابی فائرنگ کے نتیجے میں ملزم ہلاک ہوگیا۔ انچارج سی آئی ڈی دہشت گردی ونگ راجہ عمر خطاب کے مطابق ہلاک ملزم کی شناخت شاکر عرف شاکا کے نام سے ہوئی ہے جس کا تعلق لیاری گینگ وار سے ہے جبکہ ملزم پولیس اہل کاروں کے قتل سمیت دیگر جرائم کی سنگین وارداتوں میں مطلوب تھا اور اس کے قبضے سے اسلحہ و دستی بم سمیت دیگر سامان بھی برآمد ہواہے، ملزم کی گرفتاری پر 5 لاکھ روپے انعام مقرر کیا گیا تھا۔