آئی ٹی پی میں کمی سے سرامک انڈسٹری بحران میں مبتلا

درآمدی مصنوعات کی یلغار، بڑے پیمانے پر مس ڈکلریشن اور انڈر انوائسنگ مسائل کا باعث

Business Reporter February 12, 2015

مسابقت دشوار، مقامی پیداوار استعداد سے 40 فیصد کم ہوچکی ہے، سیرامک ٹائلز مینوفیکچررز فوٹو: فائل

MIRPUR: سرامک ٹائلز کی درآمد پر امپورٹ ٹریڈ پرائس میں کمی نے مقامی سرامک انڈسٹری کو بحران سے دوچار کردیا ہے۔

عالمی سطح پر ٹائلز کی درآمد پر ڈیوٹی بڑھائی جارہی ہے، سرامک انڈسٹری درآمدی مصنوعات کی یلغار، بڑے پیمانے پر مس ڈکلریشن اور انڈرانوائسنگ کا شکار ہے اور مقامی پیداوار استعداد سے 40 فیصد تک کم ہوچکی ہے تاہم پاکستان میں الٹی گنگا بہہ رہی ہے، دسمبر 2014 میں آئی ٹی پی میں 20 فیصد کمی کردی گئی جس کے بعد پاکستانی سرامک انڈسٹری کیلیے چین کے ساتھ مشرق وسطیٰ اور ایران سے درآمد شدہ ٹائلز سے بھی مسابقت مزید دشوار ہوگئی ہے۔

پاکستان سیرامک ٹائلز مینوفیکچررز ایسوسی ایشن کے مطابق آئی ٹی پی میں 20 فیصد کمی اب تک کی آئٹم کی آئی ٹی پی میں یکمشت کی جانے والی سب سے نمایاں کمی ہے، فیصلہ سازوں نے صنعت کو داؤ پر لگاتے ہوئے مقامی خام مال سے تیار مصنوعات پر درآمدی مصنوعات کو ریلیف فراہم کیا ہے جس سے اس شعبے میں کی جانے والی اربوں روپے کی سرمایہ کاری اور ہزاروں افراد کا روزگار بھی بھی داؤ پر لگ گیا ہے.

چینی مصنوعات کی بڑے پیمانے پر انڈرانوائسنگ کے باوجود چینی ٹائلز پر آئی ٹی پی 2010 سے کم کی جارہی ہے، مقامی صنعت کی پیداواری گنجائش 60 ملین اسکوئر میٹر ٹائلز سالانہ ہے تاہم درآمدی مصنوعات کی یلغار کی وجہ سے پیداواری استعداد کو بروئے کار لانے کی شرح میں روز بہ روز کمی آتی جا رہی ہے، اس ضمن میں نیشنل ٹیرف کمیشن بھی کوئی فعال کردار ادا نہیں کرسکا۔ انڈسڑی نے مطالبہ کیا ہے کہ آئی ٹی پی کو متعین کرنے کیلیے شفاف طریقہ اپنایاجائے اور برآمدی ممالک کی سرکاری ویب سائٹس پر دستیاب ڈیٹا اور ٹیکنالوجی سے استفادہ کیا جائے۔