اسرائیل کا فلسیطینیوں کے 20 ہزار مکانات منہدم کرنیکا فیصلہ

اسرائیلی حکام نے مکانوں کو گرانے کے لیے لائسنس کے بغیر تعمیر کا جواز ڈھونڈ نکالا

APP February 16, 2015

مشرقی القدس میں فلسطینیوں کے20ہزار مکانات کو شارٹ لسٹ کرلیا گیا۔ فوٹو: اے ایف پی/فائل

اسرائیلی حکومت نے مشرقی القدس میں فلسطینیوں کے 20 ہزار مکانات منہدم کرنے کا فیصلہ کیا ہے۔

یروشلم سینٹر فار سوشل اینڈ اکنامک رائٹس کی طرف سے جاری بیان میں کہاگیاہے کہ اسرائیلی حکام نے مشرقی القدس میں فلسطینیوں کے 20 ہزار مکانات کو شارٹ لسٹ کردیاہے جنھیں گرایا جائے گا، تنظیم کے ایک عہدیدارزیادہ موری نے بتایاکہ اسرائیلی حکام نے ان مکانات کو گرانے کے لیے یہ جواز ڈھونڈ نکالا ہے کہ یہ مکانات اسرائیلی تعمیراتی لائسنس کے بغیر تعمیر کیے گئے۔ انھوں نے کہاکہ اسرائیل کی جانب سے مکانات کی تعمیر کے لیے لائسنس کی شرط ظالمانہ اقدام ہے جس کا مقصد فلسطینیوں کوسزادینا ہے. دلچسپ امر یہ ہے کہ یہ شرائط یہودی آبادکاروں پرعائد نہیں.

اسرائیلی میڈیانے 9فروری کو اطلاع دی تھی کہ حکومت نے یروشلم کے قریب4 مربع کلومیٹرعلاقے کوقبضے میں لے لیاہے جس میں رہائشی منصوبہ شروع کیا جارہا ہے۔واضح رہے کہ بین الاقوامی برادری یہودیوں کی آبادکاری کے ان منصوبوں پرتشویش کا اظہار کرچکی ہے۔