2 پاکستانی لڑکیوں نے مشہور انگلش گانا ’بے بی‘ گا کر لوگوں کو حیرت میں ڈال دیا

گانے کو سننے والا کسی بھی لمحے یہ اندازہ ہی نہیں کر پاتا کہ یہ گلوکارائیں انگلش سے بالکل ہی ناواقف ہیں

---

لاہور: شوق اور جنون زبان و مکان کے فرق کو مٹا دیتا ہے اور جب کچھ کرجانے کا جذ بہ دل میں موجیں مارے تو ایسے حیرت انگیز کارنامے سامنے آتے ہیں جنہیں دیکھ کرعقل دنگ رہ جاتی ہے ایسا ہی کچھ کیا گلیوں میں گانا گانے والی دو پاکستانی لڑکیوں نے جنہوں نے انگلش زبان سے ناواقفیت کے باوجود معروف پاپ گلوکارہ جسٹن بیبر کا مشہور گانا 'بے بی' گا کر لوگوں کو حیرت میں ڈال دیا۔

یہ شاندار کارنامہ انجام دینے والی لڑکیاں کون تھی ان کا نام تو معلوم نہیں ہوسکا لیکن اس گانے کی ویڈیو نے سماجی رابطے کی ویب سائٹس پر تہلکہ مچادیا اور گانے کو سننے والا ہر کوئی اس کے سحر میں کھوگیا۔ ویڈیو میں دیکھا جا سکتا ہے کہ دو لڑکیاں روایتی پاکستانی لباس پہنے ایک گلی میں کھڑی عالمی شہرت یافتہ گلوکارہ جسٹن بیبر کا گانا او بے بی، بے بی، لائیک بے بی، آئی تھاٹ یو ووڈ آل ویز بی مائن' بڑے اعتماد اور متاثر کن انداز میں گا رہی ہیں جس کے پس منظر میں ایک خاتون ہاتھ میں پکڑے چھوٹے سے سلور کے مٹکے سے میوزک بجا کر اس گانے میں جان ڈال رہی ہے جبکہ اس کو سننے والا کسی بھی لمحے یہ اندازہ ہی نہیں کر پاتا کہ یہ گلوکارائیں انگلش سے بالکل ہی ناواقف ہیں۔

گانا گانے والی ایک لڑکی کی آواز میں چھپا درد اور دوسری لڑکی کی طرف سے اسپورٹنگ ووکل نے گانے کو چار چاند لگادیئے جس سے گانے کو سننے والا اس آواز کے درد کو اپنے دل میں محسوس کیے بغیر نہیں رہ سکتا۔

جس طرح جسٹن بیبر کو اسکوٹر براؤن نے یوٹیوب پر اس کا گانا سن کر دریافت کیا اور آج اس کی آواز دنیا بھر کے لاکھ دلوں کی دھڑکن بن چکی ہے اسی طرح ان آوازوں کو ہو سکتا ہے کہ کوئی دریافت کرلے اور یہ ایک دن گلوبل میوزک اسٹار اوشرکا حصہ بن جائیں۔