بیرونی ادائیگیوں کے دبائو کے باعث انٹربینک مارکیٹ میں امریکی ڈالر کے مقابلے میں روپے کی قدربھی تنزلی کی جانب گامزن ہوگئی ہے۔

جس سے جمعہ کوڈالر کے انٹربینک ریٹ 15 پیسے کے اضافے سے 95.50 روپے کی بلند ترین سطح تک پہنچ گئے۔ منی مارکیٹ کے ذرائع کا کہنا تھا کہ خام تیل کی مد میں20 کروڑڈالر کی ادائیگیوں سے انٹربینک مارکیٹ میں امریکی ڈالر کی طلب ورسد کا توازن بگڑگیا ہے، دوسری جانب اوپن کرنسی مارکیٹ میں بھی روپے کی نسبت ڈالرکی قدر20 پیسے کے اضافے سے95.60 روپے کی سطح پر پہنچ گئی۔