پی آئی اے نے ناروا سلوک پر 10 مارچ تک بنگلادیش کے لئے پروازیں منسوخ کردیں

بنگلادیشی سیکیورٹی ایجنسیزکی جانب سےعملے کے ساتھ ناروا سلوک کیا گیا اس لئےمعاملے کےحل تک پروازیں نہیں چلائیں گے،ترجمان

ویب ڈیسک February 27, 2015

بنگلہ دیشی حکام نے ڈھاکہ میں تعینات پی آئی اے کے کنٹری مینجرعلی عباس کے گھر پر 3 روز قبل چھاپہ ماراتھا ۔ فوٹو: فائل

پی آئی اے نے بنگلادیشی سیکیورٹی ایجنسیز کے منفی رویئے کے باعث تمام پروازیں 10 مارچ تک منسوخ کردیں۔

ایکسپریس نیوز کے مطابق ترجمان پی آئی اے کا کہنا ہے کہ بنگلادیشی انٹیلی جنس اہلکاروں کی جانب سے ملازمین اور مسافروں سے ناروا سلوک پرتمام پروازیں 10 مارچ تک منسوخ کردی گئی ہیں اور اس دوران کوئی پرواز مسافروں کو لے کر ڈھاکا نہیں جائے گی۔ ترجمان نے واضح کیا کہ پی آئی اے حکام اور عملے کو ہراساں کرنے کے خلاف پروازیں منسوخ کی گئیں اور معاملے کے حل تک احتجاج جاری رہے گا۔

واضح رہے کہ بنگلہ دیشی حکام نے ڈھاکہ میں تعینات پی آئی اے کے کنٹری مینجر علی عباس کے گھر پر 3 روز قبل چھاپہ مارا اور حکام نے سونا اور کرنسی اسمگلنگ میں ملوث ہونے کا الزام لگاکر کئی گھنٹے تک گھر کی تلاشی لی اور اس دوران اہلخانہ کو ہراساں بھی کیا گیا جبکہ ناروا سلوک پر منیجر علی عباس اہلخانہ سمیت وطن واپس آگئے،بنگلہ دیشی حکام نے اسی پر اکتفا نہیں کیا بلکہ بدھ کو کراچی سے ڈھاکہ پہنچنے والی پی آئی اے کی پرواز پر بھی چھاپہ مارا اور ڈھائی گھنٹے تک طیارے کی تلاشی لی۔