سانحہ شکارپور میں ملوث 2 دہشت گرد گرفتار پولیس کا دعویٰ

دہشت گردوں نے شکارپور واقعے کے خلاف دھرنے دینے والوں پر بھی حملے کی تیاری کا انکشاف کیا ہے، پولیس، فوٹو:فائل

---

KARACHI: پولیس نے سانحہ شکار پور میں ملوث 2 دہشت گردوں کو گرفتار کرنے کا دعویٰ کیا ہے۔

ایکسپریس نیوز کے مطابق قانون نافذ کرنے والے اداروں نے سانحہ شکار پور کی تحقیقات میں اہم پیش رفت کا دعویٰ کرتے ہوئے 2 دہشت گردوں کو گرفتار کرلیا ہے۔ ایس یس پی ثاقب اسماعیل میمن کے مطابق دونوں دہشت گردوں کو گرفتار ملزمان کی نشاندہی پر کچے کے علاقے سے گرفتار کیا گیا ہے اور ان کا تعلق بلوچستان کےعلاقے ڈیرہ مراد جمالی سے ہے۔

ایس ایس پی کا کہنا تھا کہ گرفتار دہشت گردوں نے خودکش حملہ آور کو گھر میں پناہ دی تھی اور وہ ایک ہفتے تک قریبی علاقے خواستی بروہی میں ٹھہرا جبکہ گرفتار دہشت گردوں کے قبضے سے خودکش جیکٹ، بارودی مواد اور اسلحہ بھی برآمد کیا گیا ہے۔

پولیس کے مطابق دہشت گردوں نے دوران تفتیش اپنی کارروائیوں سے متعلق بھی اہم انکشافات کیے ہیں جس میں دہشت گردوں نے بتایا کہ انہوں نے شکارپور بم دھماکے کے خلاف دھرنے دینے والوں پر بھی حملے کی تیاری کررکھی تھی۔

واضح رہے کہ 30 جنوری کو شکارپور کی لکھی در امام بارگاہ میں خودکش حملے کے نتیجے میں 60 سے زائد افراد جاں بحق ہوئے تھے جب کہ حکومت نے دھماکے میں ملوث دہشت گردوں کی اطلاع دینے پر 2 کروڑ انعام کا اعلان بھی کر رکھا ہے۔