مٹھی میں غذائی کمی کے باعث مزید 5 بچے دم توڑ گئے

ضلع بھر میں رواں ماہ غذائی کمی کے شکار ہلاک ہونے والے بچوں کی تعداد 36 ہوگئی۔ فوٹو: فائل

---

تحصیل مٹھی میں غذائی کمی کے باعث مزید 5 بچے دم توڑ گئے جس کے بعد رواں ماہ ہلاکتوں کی تعداد 36 ہوگئی۔

ایکسپریس نیوز کے مطابق سندھ حکومت کی لاپرواہی اور عدم دلچسپی کے باعث ضلع تھرپارکر میں غذائی کمی کے باعث بچوں کی ہلاکتوں کو روکا نہ جاسکا اور مزید 5 بچے سول اسپتال مٹھی میں انتقال کرگئے۔ ضلع بھر میں رواں ماہ غذائی کمی اور مختلف بیماریوں سے ہلاک بچوں کی تعداد 36 ہوگئی۔

واضح رہے کہ گزشتہ سال تھرپارکر کی چاروں تحصیلوں مٹھی،چھاچھرو،ڈیپلو اورننگرپارکر میں سینکڑوں بچے غذائی کمی کے باعث موت کے منہ میں چلے گئے تھے اور رواں سال بھی یہ سلسلہ جاری ہے۔