کمشنر ان لینڈ ریونیو آغا ہدایت اللہ کو چارج شیٹ کر دیا گیا

SIALKOT:
فیڈرل بورڈ آف ریونیو (ایف بی آر) نے کمشنر ان لینڈ ریونیو (زون ٹو) ریجنل ٹیکس آفس کراچی آغا ہدایت اللہ کو غیرملکی انجینئرنگ کمپنی کو 2012-13 میں غیرقانونی طور پر استثنٰی سرٹیفکیٹ دینے کے الزام میں چارج شیٹ کیا گیا ہے۔


ایف بی آر حکام کی جانب سے کہا گیا ہے کہ یہ اقدام سنگین مس کنڈکٹ ہے جس سے قومی خزانے کو اربوں روپے کا نقصان اٹھانا پڑا۔ آغا ہدایت اللہ کو چیف کمشنر لارجر ٹیکس پیئر یونٹ کراچی کی سربراہی میں ہونیوالی انکوائری کی رپورٹ کی روشنی میں چارج شیٹ کیا گیا ہے۔

ایکسپریس انویسٹی گیشن سیل کو ملنے والی دستاویزات کے مطابق آغا ہدایت اللہ کیخلاف قواعد کے تحت مزید انضباطی کارروائی کا آغاز کر دیا گیا ہے اور انھیں اپنے دفاع میں تحریری جواب داخل کرنے کی ہدایت کی گئی ہے۔