ملک وقوم کی ترقی کے لیے دہشت گردی کے خلاف جنگ ہر حال میں جیتنا ہوگی شہباز شریف

بےگناہ اور معصوم پاکستانیوں کا خون بہانے والے عبرتناک انجام کو پہنچیں گے، وزیر اعلٰی پنجاب فوٹو: فائل

---

وزیر اعلیٰ پنجاب شہباز شریف نے کہا ہے کہ دہشت گردی،انتہا پسندی اور فرقہ واریت ملک کی ترقی کی راہ میں بڑی رکاوٹ ہے اس لئے دہشت گردی کے خلاف جنگ ہر حال میں جیتنا ہوگی۔

لاہور میں مسلم لیگ (ن) کے ارکان قومی اسمبلی ملک سلطان محمود ہنجرا، دانیال عزیز اور جاوید علی شاہ نے وزیراعلیٰ پنجاب شہباز شریف سے ملاقات کی۔ ملاقات کے دوران امن و امان کی مجموعی صورت حال اور ملک کو درپیش چیلنجز سے متعلق تفصیلی تبادلہ خیال کیا گیا۔

وزیر اعلیٰ پنجاب کا کہنا تھا کہ دہشت گردی،انتہا پسندی اور فرقہ واریت ملک کی ترقی کی راہ میں سب سے بڑی رکاوٹ ہے، قوم نے دہشت گردی کے خاتمے کی جنگ میں لازوال قربانیاں دی ہیں، ملک وقوم کی ترقی کے لیے دہشت گردی کے خلاف جنگ ہر حال میں جیتنی ہے، بےگناہ اور معصوم پاکستانیوں کا خون بہانے والے عبرتناک انجام کو پہنچیں گے۔